Discusion pisa entre abogado y Fiscal
ORANJESTAD (AAN): Abogado mr. Canwood a reclama na Hues durante tratamento di un caso di abuso di mucha, e practica fastioso cu agentenan di KZP ta haci pa cu su cliente.
Esaki a causa un discusion pisa entre Fiscal y abogado. Esaki a sosode durante tratamento di e caso penal contra e homber H. di 70 aña, kende cu a abusa di un mucha homber G. di 11 aña.
Ta asina cu Fiscal ta haya cu tin suficiente prueba di sosten contra H. cu el a abusa di e mucha. Fiscal a bisa cu H. a forza G. pa abusa di dje.
E victima ta keda afecta y e mama a mustra cu e victima ta bay tratamento. Di Januari 2021 pa Juni 2021, H. a abusa di su sobrino di 11 aña. Fiscal a exigi 6 aña di prison.
ABOGADO A RECLAMA KZP: Abogado mr. Canwood a bisa Hues cu e ta haya hopi fastioso cu agentenan di KZP ta bay interoga su cliente H. despues di a papia cun’e.
E agentenan a puntra H. kico el a papia cu su abogado. E abogado a señala cu esaki ta violacion di secreto entre abogado y cliente. El a bisa Hues cu e ta spera cu esaki ta ultimo biaha cu algo asina ta pasa.
NO TIN PRUEBA: mr. Canwood a bisa Hues cu contrario na Fiscal, no tin suficiente prueba di sosten. El a señala cu e mama ta pone su yiu bao presion pa bisa cu H. a abusa di dje. E mama a mustra su yiu un voice recorder y a gaña su yiu cu Polis ta scuchando y si e no papia e berdad, Polis lo bay ser’e. E mucha a bisa Polis cu si e no papia e mama lo kita su Sony PlayStation for di dje. E mucha a bisa leu leu e sa bay cerca H. E mucha a bisa cu el a bay drumi y lanta cu dolor. Esaki a sosode 5 pa 6 biaha. Esaki na opinion di mr. Canwood no ta suficiente prueba.
Despues e mama ta yama Polis y bisa cu e declaracion di su yiu no ta cuadra cu loke su yiu a cont’e. Su siguiente dia e mama a hiba e mucha y e ora e mucha ta bisa cu el a worde abusa. El a bisa Polis cu e mester declara pasobra sino lo kita PlayStation for di dje.
Na opinion di e abogado, esaki claramente ta mustra cu e mama ta presiona su yiu pa declara. El a sigui bisa cu na dado momento e mucha G. den su declaracion ta menciona nomber di otro muchanan cu a worde abusa. Ora polis a puntr’e di unda el a haya e informacion aki, el a bisa cu ta su mama y tata a bis’e. E abogado ta haya cu e agentenan mester a haci mas investigacion.
- Canwood a bisa Hues cu despues di 3 luna di e incidente, e mama ta trece un rapport di docter cu ta mustra cu tin scheur na e parti atras di e mucha. E abogado a bisa Hues cu el a bay check y splicacion cu el a haya ta mustra cu un scheur no ta necesario cu ta abuso. Esey ta algo normal.
E docter ta bisa cu el a mira un scheur y cu ainda tin marca cora. Esey na opinion di e abogado, ta mustra algo recien y no tin nada di haci cu violacion. E ta kere cu tin mas cos lo ta pasando y ta pinta H. como sospechoso.
Tin documentacion recien cu e mucha su comportacion a cambia y no necesariamente esey tin di haci cu e caso di violacion. E por ta termento na school. E abogado a conclui cu no tin suficiente prueba y mester declara H. liber. E ta haya e exigencia di Fiscal hopi halto y mirando edad di H. y su reputacion, tur ta na suela. E demanda di daño no tin splicacion y ta kere cu lo mester cuminsa un caso civil.
FISCAL TA REACCIONA: Fiscal a reacciona cu Polis por haci tur tipo pregunta durante investigacion y tambe puntra sospechoso di kico el a papia cu su abogado. Fiscal a remarca cu ningun momento e mama a pone e mucha bao presion.
E mucha a bisa cu el a scucha su mama y tata ta papia y menciona nomber di muchanan. Ta esey so. Ningun momento e mucha ta bisa cu el a worde presiona. E punto cu dokter ta constata scheur na e parti atras di e mucha no ta manera e abogado a mustra. No ta haya esaki acceptable. E ta mas un prueba di abuso cu loke abogado ta pretende.
Hues a cera tratamento di e caso y 18 Februari 2022 lo tin sentencia.
