Den caso di homber cu a dal otro cu bloki den cabez
ORANJESTAD (AAN): Recien den Corte di Husticia a trata e caso penal cu Ministerio Publico a cuminsa contra e homber C.N.M. di 47 aña procedente di Jamaica biba na Aruba.
Fiscal ta haya C.N.M. culpabel di intento di mata intencional di e homber I. y a exigi 3 aña di prison di cual 1 aña ta condicional. Abogado mr. Gravenstijn ta haya cu no por papia di intento di mata. E abogado a cuestiona e raport di psicologo cu promer ta conclui cu C.N.M. no ta responsabel pa su actonan y algun dia promer cu e caso e ta cambia di decision. E psicologo ta comparti e decision di psikiatra cu ta bisa cu C.N.M. ta menos responsabel pa su actonan. E abogado ta haya cu mester busca opinion di un otro psicologo of laga e psicologo bin den Corte y worde interoga door di Hues.
E acusacion cu Fiscal di Ministerio Publico a presenta den Corte ta cu 10 Juni 2023, e acusado C.N.M. a purba mata e homber I., door di dal’e cu bloki na cabez. Fiscal ta haya cu esaki ta un a intento di mata, subsidiario un intento di maltrato severo. Fiscal a sigui bisa cu e mesun dia C.N.M. a menaza I. cu e lo mat’e. Tambe a purba maltrata e homber P. Tambe e mesun dia a menaza P. cu un shovel. E mesun dia a kibra glas di auto di Polis.
Ta asina cu C.N.M. ta sufri di problema di epilepsia y mental. Hues a puntr’e con e ta sinti. El a bisa cu e tin 13 aña ta usando pildernan pero awor cu el a stop, e ta sinti’e bon. Den KIA el a haya inyeccion.
Maltrato: Hues a puntra C.N.M. kico a pasa 10 Juni 2023. Segun C.N.M., el a bay cerca e homber I. pa haya sa number di cellular di su ruman homber pero I. a trat’e manera no conoce, siendo cu nan ta bisiña di otro. Hues a mustra cu I. a declara cu C.N.M. a bay cerca e yiu muher di I. pa puntra number.
Segun C.N.M., e homber I. a cuminsa yam’e cosnan cu e no a gusta y el a bira agresivo. I. ta pretende cu e ta e homber mas duro y ora I. a bay riba dje pa dal’e, el a pasa man pa un bloki di beton y dal’e den cabez. Hues a puntra C.N.M. si e dia ey el a bebe pilder pa su problema mental. C.N.M. a bisa cu e dia ey e no a bebe su pilder.
Hues a bisa cu C.N.M. a menaza I. cu lo tir’e mat’e. Segun I., C.N.M. a menace cu e tin un machinegun paden y lo tir’e. E ora ey C.N.M. a dal’e cu e bloki di cement. Ora Polis a yega, e agente di Polis, P., a bisa cu C.N.M. tabatin un shovel y bate di baseball den man y a purba dal P. Segun C.N.M., el a dal e auto di Polis pero no a ataca P. Hues a bisa cu C.N.M. a menaza e agente cu lo mat’e. Segun C.N.M. e no ta corda esey.
Problema mental: Hues a bisa cu psicologo y psikiatra a evalua C.N.M. Ambos ta yega na e conclusion cu C.N.M. tin problema mental y cu diripiente e ta bira agresivo y ta perde realidad. C.N.M. a bisa Hues cu despues di 13 aña, el a stop di bebe e pildernan. Awor cu e tin 6 luna sera den KIA, e ta sinti hopi mas mihor sin e pildernan.
Hues a bisa cu e psicologo y psikiatra ta haya cu C.N.M. mester bebe pildernan. Segun C.N.M., ora e bebe e pildernan e ta sinti su mes debil. E no kier bebe pildernan. Hues a bisa cu e E psicologo y psikiatra ta haya cu C.N.M. ta menos responsabel pa su actonan.
Fiscal: Fiscal ta haya C.N.M. culpable di a maltrata cu un bloki di beton. E victima I. a sufri un kap na cabez. Den Corte por scucha C.N.M. bisa cu e ta I. a menace. Fiscal no ta kere esaki. Fiscal ta haya e intento di mata intencional, proba. Na Polis C.N.M. a bisa cu e kier a habri cabez di I. cu e bloki di beton. Tambe Fiscal ta haya proba cu C.N.M. a menaza I. Fiscal ta haya tambe cu C.N.M. a purba maltrata e agente P. cu un shovel.
Tambe C.N.M. a menaza e agente di Polis cu morto. Fiscal a sigui bisa cu C.N.M. a causa destruccion na auto di Polis, kibra un glas di e auto y un porta. Ta calcula cu gastonan pa drecha ta 4 mil Florin. Segun Fiscal, tin raport di Reclasering, psicologo y psikiatra cu ta mustra cu C.N.M. ta menos responsabel pa su actonan.
Fiscal ta haya e casonan hopi serio. E por tabatin consecuencianan mas serio. Pa cu e castigo, el a tene cuenta cu e raportnan di psicologo y psikiatra. Fiscal a exigi 3 aña di prison di cual 1 aña ta condicional cu 3 aña di prueba. Esaki bou guia di Reclasering y tratamento di psikiatra.
Abogado ta cuestiona psicologo: Abogado mr. Gravenstijn a bisa Hues cu e no ta di acuerdo cu e acusacion di intento di mata. E ta haya cu aki por papia di maltrato cu arma y destruccion. E abogado a bisa Hues cu C.N.M. a coopera cu investigacion y a reconoce cu el a maltrata I. cu un bloki pero no cu e intencion di mat’e. El a bisa cu C.N.M. ta desmenti cu a menaza agente di Polis cu morto y a purba dal’e cu un shovel.
Na opnion di mr. Gravenstijn, C.N.M. a bira agresivo ora cu I. a menac’e di lo tir’e. E abogado a menciona ley cu ta bisa cu no por castiga hende cu ta sufri di problema mental. Mr. Gravenstijn a bisa Hues cu psicologo y psikiatra a evalua C.N.M. y constata cu e tin problema mental.
E abogado a cuestiona e raport di psicologo cu promer ta duna un splicacion hopi detaya di C.N.M. y ta conclui cu e no ta responsabel pa su actonan y un dia pa otro ta manda un otro raport caminda e ta cambia 180 grado di loke el a dicidi anterior cu C.N.M. no ta responsabel. Awor e tambe ta conclui cu psikiatra cu C.N.M. ta menos responsabel pa su actonan.
E ta haya cu e psicologo no a haci investigacion corecto y a sigui punto di bista di psikiatra. E abogado ta haya cu mester laga un otro psicologo evalua su cliente of Hues mester interoga e psicologo den Corte. E abogado a bisa cu e ta haya e exigencia di Fiscal di 3 aña di prison exagera.
Ta asina cu Fiscal a bisa Hues cu si Hues ta haya necesario por pospone e caso y laga yama e psicologo pa haci preguntanan.
Hues a sera tratamento di e caso y a bisa cu e lo bay pensa y 22 December 2023 lo tin decision pa 10’or di mainta.
