ORANJESTAD (AAN): E homber Z.R.T.(23) a scucha Hues confirma e exigencia di Fiscal, 6 aña di prison pa a tira riba 25 Januari 2022 riba un persona dilanti Blue Moon.
Tambe Hues ta haya Z.R.T. culpable di posesion di arma di candela. Hues ta comparti opinion di Fiscal cu Z.R.T. no ta culpable di e tiramento den Pindastraat y ta declar’e liber.
FISCAL
Tratamento di e caso a tuma lugar algun siman pasa caminda Fiscal a bisa cu Z.R.T. ta admiti di a tira dilanti Blue Moon. Polis a bisa cu Z.R.T. a resisti contra su detencion. Fiscal a bisa cu for di investigacion di Polis ta sali na cla cu un guardia a bisa Polis cu ta Z.R.T. a tira.
Na opinion di Fiscal, riba video di seguridad por mira kico tur a pasa. Por mira cu Z.R.T. tabatin un pistol color nikel y a tira den direccion di e homber cu a core bay. Despues el a tira e arma afor y ta bay bek Blue Moon caminda el a wordo deteni. Fiscal a bisa cu no por mira cu ta dos hende manera Z.R.T. ta bisa, lo a saca arma p’e. Fiscal ta haya cu aki no por papia di cu Z.R.T. a actua den defensa propio. Fiscal ta haya cu Z.R.T. por a herida otro hendenan cu tabata para ey banda. E ta considera loke Z.R.T. a haci ta un intento di mata mirando cu Z.R.T. a dirigi e arma riba e persona y a tira diferente biaha. Fiscal a sigui bisa cu subsidiario e ta acusa Z.R.T. cu e lo por a causa herida severo. E no ta haya cu aki ta trata di premedita y a pidi pa declara Z.R.T. liber pa esaki. Fiscal ta haya cu Z.R.T. tabatin un arma den su poder, aunke cu Polis no a haya e arma.
NO PROBA TIRA RIBA UN CAS
Pa loke ta e tiramento na Pindastraat, Fiscal a bisa cu esaki a sosode algun ora promer cu e incidente na Blue Moon. A haya 3 huls di balanan y impacto di bala riba e cas. Nan ta bisa cu un scooter color blauw y un brommer a pasa y tira. Un di e personanan tabatin cabey rasta. A mira cu e arma ta color di nikel cu ta mesun color di arma cu Z.R.T. a usa na Blue Moon. Sinembargo, Fiscal ta haya cu no tin suficiente prueba cu ta Z.R.T. ta esun cu a tira. El a pidi Hues pa declara Z.R.T. liber pa esaki.
EXIGI 6 AÑA DI PRISON
Fiscal a mustra cu posesion di arma di candela ta un problema hopi serio na Aruba. Hopi hoben ta cana arma. Ta hopi caso di tiramento ta sosode y hasta tin casonan di matamento. El a bisa cu Ministerio Publico a aumenta castigo pa posesion di arma di candela. E ta haya cu tira na un lugar publico, manera Blue Moon ta bira un asunto mas serio. El a exigi 6 aña di prison.
SENTENCIA
Hues via video conference a bisa cu e ta haya, mescos cu Fiscal ta di opina, cu Z.R.T. no ta culpable di a tira na Pindastraat. El a declara Z.R.T. liber pa e acusacion aki.
Pa loke ta e tiramento dilanti Blue Moon, Hues ta haya Z.R.T. culpable di intento di mata door di tira riba un persona no conoci. Hues a bisa cu Z.R.T. tambe ta culpable di resisti contra su detencion. Hues a sigui bisa cu e ta haya proba cu Z.R.T. tabatin un arma di candela cu bala.
RECHAZA DEFENSA PROPIO
Hues a rechaza e defensa di abogado mr. Zara, cu Z.R.T. a actua den defensa propio. Hues ta haya cu no tin ningun indicacion concreto cu e otro persona lo tabatin un arma di candela y a saca esaki pa Z.R.T., manera Z.R.T. ta pretende.
TA ACUSADO A BAY DAL Y TIRA RIBA PERSONA
Na opinion di Hues, si esey tabata e caso, no ta aceptabel cu Z.R.T. a tira den direccion di e persona, pa defende su mes. For di video di seguridad por mira cu ta Z.R.T. y un otro persona tabatin e persona wanta y cu Z.R.T. a dal’e cu a arma na su cabez. Ora cu e persona a logra los y core bay, Z.R.T. a tira riba dje.
Na opinion di Hues, e no ta haya cu por papia aki di cu Z.R.T. a wordo menaza door di e persona. El a bisa cu e video di seguridad, ta mustra mas bien cu ta Z.R.T. a cana bay riba e persona y busca confrontacion. Ta Z.R.T. a dal e persona cu arma na su cabez y despues a tira riba e persona riba un distancia cortico. Na opinion di Hues, esaki ta mustra cu ta Z.R.T. a ataca e persona. E no ta mira cu aki por papia di defensa propio.
CONFIRMA 6 AÑA DI PRISON
Pa cu castigo, Hues a bisa cu e ta tene cuenta cu Z.R.T. a tira riba un persona na un lugar publico caminda tabatin hopi hende presente. Ta puro suerte cu ni e persona y ningun hende a wordo herida. Hues a mustra cu e victima den caso asina, ta keda pa tempo largo cu trauma. E caso aki ta causa sentimento di inseguridad y intrankilidad den comunidad.
Hues tambe a mustra cu door cu Z.R.T. a resisti contra su detencion, el a haci e trabou di agentenan di Polis dificil y ta mustra un falta di respet pa agentenan di Polis. Tambe Hues a tene cuenta cu anterior Z.R.T. a haya condena pa violencia y posesion di arma. Hues ta haya e exigencia di Fiscal na su lugar y a condena Z.R.T. na 6 aña di prison.
