El a bisa cu el a wordo menaza --- ORANJESTAD (AAN): E homber Arubiano R.St.J. biba na Hulanda a presenta dilanti Hues pa e caso penal cu Ministerio Publico a cuminsa contra dje.
E ta wordo acusa cu dia 7 Augustus 2021 el a exporta cocaina.
MENAZA PA HIBA DROGA
Hues a mustra cu R.St.J. a wordo deteni na aeropuerto, despues cu cacho anti droga a reacciona riba dje. A constata cu e tabatin un body pack carga cu cocaina. E tabatin 3 paki getape na su curpa cu a pisa1754 gram di cocaina, cual e mester a hiba Hulanda. Segun R.St. J. el a wordo menaza pa hiba e droga. El a bisa cu e no conoce e hendenan. Hues a puntr’e con e hendenan a drenta den contacto cun’e. R.St.J. a bisa cu e tabata na laman cu su mama y inespera e hendenan aki a bin riba dje. El a bisa cu e ta biba na Hulanda y a bin Aruba pa vacacion. Hues a remarca con e hendenan aki lo por sa esaki. Hues ta haya straño cu hendenan ta menaza R.St.J. pa hiba droga. Segun R.St.J. nan a menaza cu lo mata su famia. Nan a mustr’e potret di su dos yiunan na Hulanda. Nan a dun’e un cellular pa nan comunica cun’e y nan a bis’e pa no wak nan. Segun R.St.J. e no a tuma risico mirando cu nan tin potret di su yiunan na Hulanda.
Hues a bisa cu e ta haya esaki un storia straño. Pakico nan ta bay menaza un persona siendo cu e persona por a bay Polis. Hues ta haya e cos aki no creibel. R.St.J. a bisa Hues cu su yiunan ta na peliger. Hues a bisa cu na aeropuerto R.St.J. a haya e bodypack for di un persona. Tin imagenan riba video di seguridad. Nan a mira un hende ta duna R.St.J. algo. Segun R.St.J. e hende ta un familiar cu a dun’e placa pa cumpra regalo pa su yiunan.
FISCAL
Fiscal ta haya legalmente proba cu R.St.J. a exporta droga. El a bisa cu cacho anti droga a reacciona riba R.St.J. Na su curpa a constata cu tabatin 3 paki pega. Fiscal a bisa cu no ta acceptable cu mula ta bisa cu el a menaza. Normal ta scucha mula bisa cu el a wordo ofreci pago. Fiscal a bisa Hues cu droga ta causa miseria rond mundo. E ta tuma R.St.J. na malo cu e no a bay Polis y haci denuncia. El a mustra cu den pasado R.St.J. a wordo condena pa asalto arma y ta promer biaha pa droga. Fiscal a bisa cu e no ta mira motibo pa desvia di maneho di Ministerio Publico. El a exigi 24 luna di prison di cual 12 luna ta condicional cu un tempo di prueba di 3 aña.
ABOGADO
Mr. D.Croes a bisa Hues cu por compronde cu e transporte di droga ta mustra straño cu hende ta wordo menaza pa hiba droga. E abogado a mustra cu R.St.J. practicamente a lanta riba caya na Aruba. Su mayornan no a bishit’e na KIA. Ta otro persona a bay yud’e y R.St.J. a dicidi 7 aña pasa pa bay biba na Hulanda. El a crea un famia na Hulanda. Na opinion di abogado mr. Croes, R.St.J. su fayo tabata pa bin Aruba pa reuni cu famia. Door cu e tabata meti den baho mundo, nan tabatin bisti riba dje. El a mustra un articulo cu a sali den corant na Hulanda caminda un ruman di R.St.J. a wordo maltrata na Hulanda pasobra e no kier a coopera. Segun e abogado, R.St.J. ta bibando den un bario hopi trankil na Hulanda. Door di menaza e no por a haci nada otro di transporta. El a bisa Hues cu R.St.J. kier bay Hulanda pa bolbe cu su famia y traha pa mantene su famia. E no por keda Aruba pa no cay den e baho mundo.
SENTENCIA
Hues a sera tratamento di e caso y a dicta sentencia di biaha. Hues no ta kere R.St.J. su storia. El a bisa cu no tin ningun indicacion di loke R.St.J. a bisa cu el a wordo menaza. Hues a bisa cu cocaina ta causa hopi criminalidad. Hues a condena R.St.J. na castigo igual na loke Fiscal a exigi esta 24 luna di prison di cual 12 luna ta condicional cu un tempo di prueba di 3 aña.
