ORANJESTAD (AAN): Den un luna di tempo, e organizadornan a wordo notifica cu Aruba por participa den e certamen di Miss Eco International, cu ta tuma lugar e aña aki na Egipto.
Como cu ta mucho laat pa tene un certamen, a core organiza un ‘casting’ di candidatanan interesa y mesora un panel di hurado a haci escogencia. Di e forma ey, e simpatica Zury Ruiz a wordo corona como Miss Eco Aruba 2022.
Y asina den como 30 dia a core haci preparacion pa e bay participa na e certamen internacional, y a haci su trabao di pone su mes na altura di tur loke tin di haber cu ecologia, a graba video, y mucho mas, y prepara su trahenan pa e bay participa aden.
Riba Diadomingo, Zury a subi vuelo pa asina bay rumbo pa Egipto pa representa Aruba y su bandera. E certamen mes lo bay ta Diabierna 17 di Maart 2022. Ban spera cu e lo regala Aruba su bunita regalo di 18 di Maart pues. DIARIO ta desea Zury tur clase di exito.
