Prome Ministro tin tur confiansa cu Aruba lo ta den bon man
ORANJESTAD (AAN): Dialuna durante conferencia di prensa di Gobierno, Prome Minister Evelyn Wever-Croes a anuncia cu e siguiente Minister Plenipotenciario pa Washington lo ta señora Zulema Dabian-Erasmus.
Prome Minister a splica cu e posicion aki ta uno importante, mirando cu e funcionario aki, lo asisti Gobierno di Aruba y pueblo en general pa logra cierto metanan, manera señora Joselin Croes a haci durante su añanan como Minister Plenipotenciario na Washington.
Señora Croes, durante su cinco añanan, como funcionario di gobierno pa representa Aruba, a logra hopi acuerdonan, cu ta di gran beneficio pa pais Aruba. El a organiza un encuentro virtual pa hende muhenan entrepreneur di Aruba y Curaçao, hunto cu e consul general di Miami y demas stakeholdernan, el a asisti Minister di Finanzas y Minister President na reunionnan di IMF y World Bank, el a asisti hunto cu Prome Minister of cualkier Minister di Aruba, cu tabata presente, na reunionnan di Asamblea General di Nacionnan Uni, el a yuda pa Aruba mantene un bon tier pa loke ta e TIP report y pa Aruba no worde "downgraded" di tier, door di Merca, tambe el a yuda den renegociacion di e acuerdo entre Aruba y Custom Border Patrol na Washington, y el a logra sera acuerdonan di cooperacion cu diferente Universidad y institutonan educacional na Merca, dunando asina oportunidad na e studiantenan di Aruba, pa por bay haci nan stage eynan, tambe a logra yega na un acuerdo entre Gobierno di Aruba y Universidad di Aruba pa reduci e "tuition fee" y cambia esaki pa "in-state tuition", na unda e studiante Arubiano lo paga "tuition", na e scolnan cu a yega na acuerdo cu nan, manera un studiante mericano.
Esakinan ta algun di e logronan grandi di señora Joselin Croes durante e cinco añanan cu el a fungi como Minister Plenipotenciario na Washington, y cu gobierno lo desea pa señora Dabian-Erasmus continua cu nan.
Prome Minister a splica cu e procedura pa scoge un Minister Plenipotenciario nobo, a bay segun palabracionnan haci durante formacion, cu partido MEP ta propone candidato pa e posicion na Hulanda y partido Raiz ta propone candidato pa e posicion na Washington.
E maneho a cambia, y a keda dicidi cu pa e funcion na Washington, ta busca un persona cu experiencia y conocemento di relacionnan internacional, cu ya caba ta traha den gobierno.
Basa riba esaki, a propone sra Dabian-Erasmus, cu ta cumpli cu tur e rekisitonan, un persona prepara y cu e cualidadnan necesario pa por representa Aruba na Washington.
Señora Dabian-Erasmus a studia international relations na Hulanda, y a gradua na aña 2005. E ta trahando na Departamento di Asuntonan Economico y a fungi tambe como “part-time” docente na Universidad di Aruba.
“Mi ta convenci, cu señora Dabian-Erasmus lo representa Aruba dignamente na Washington, pa e siguiente 4 añanan. Señora Dabian-Erasmus lo bay Washington, pa haya e traspaso di señora Joselin Croes prome cu e asumi su cargo nobo di director di Arubahuis.
Gobierno di Aruba ta gradici señora Joselin Croes pa e 5 aña di trabao desplega pa Aruba na Washington, y ta desea señora Dabian-Erasmus hopi exito.
