Un bon causa pa VRA alerta autoridadnan:
ORANJESTAD (AAN)" Ta di aplaudi cu Thomas Ruiz, presidente di Vereniging Rijscholen Aruba ta dunando charlanan den bario, relaciona cu reglanan di trafico unda obviamente tin mas di un chauffeur cu no conoce nan, of no ta worry cu nan, entre otro tocante zebrapad.
Sin duda algun, e caminda unda DOW a pinta zebrapad pasando e rotonde den e cruzada di Watty Vos Boulevard, pa chauffeurnan tuma e ruta di Ponton pa Noord, na lugar di seguridad ta ofrece peligro.
E zebrapad aki no ta wordo respeta pa mayoria chauffeur, cu ta bin na un velocidad halto, y cada bez e peaton of ciclista tin cu pasa den susto, pasobra autonan no ta duna nan chens di cruza, ni si nan tin pia poni riba e rotonde.
Awor cu instancia concerni a laga pone un señal di trafico mas pariba, cu tin un zebrapad pinta riba borchi, riba e caminda principal (dilanti e borchi grandi di Wema) varios peaton no ta baha mas di e bus cerca di e prome zebrapad sino unda cu tin e señal aki, no obstante mester haci seña cu man pa e autonan cu ta core den ambos direccion, duna e peaton un chens pa cruza caya. Esaki ta un tiki mas facil pa logra cu usando e zebrapad cerca di e rotonde na WVB Boulevard. Aki hopi chofer ta cuestiona cu tin dos zebrapad casi dilanti di otro, y esaki tin biaha ta crea un caos den e trafico cu ta saliendo di Ponton y esun cu ta drenta.
Algun persona biba na Ponton den e vecindario di Wema y cu ta depende di Arubus tur dia pa bay trabao y bin cas bek, ademas di algun mayor di alumno di EPB cu mainta tin cu tuma e caminda banda di Wema pa yega scol, y baha e mesun caminda bek merdia y tin cu cruza caminda dilanti di e borchi grandi di Wema, tambe ta mira e peligro cu tin, y ta pidi encarecidamente si DOW por pinta un zebrapad tambe entre e borchi di Wema y e otro banda di caminda. Esey por trece un miho solucion den e trafico excesivamente druk di tur dia, riba e caminda ubica entre dos rotonde, esta di Rotonde Tanki Flip y Rotonde di Ponton di WVB Boulevard.
