Despues di 33 aña largo a yega e ora pa bay disfruta di un pensioen bon mereci
ORANJESTAD (AAN): Recientemente departamento di gobierno cu ta Monumentenbureau a organisa un ceremonia di despedida pa nan directora Sra. Ing. Yvonne Webb-Kock cu a tuma lugar na El Gaucho. Aki tabata presente e team di Monumentenbureau hunto cu Minister di Finansas y Cultura, Sra. mr. Xiomara J. Maduro.
Sra. Ing. Yvonne Webb-Kock a sirbi nos pais Aruba pa 33 aña largo. Awor ta repasa e 33 añanan aki como ambtenaar y como directora di Monumentenbureau.
Sra. Ing. Yvonne Webb-Kock a drenta den servicio di gobierno dia 1 september 1989 y a cuminsa traha na Dienst Openbare Werken Aruba (DOW) den e departamento civil y despues a wordo translada pa architecten bureau di Dienst Openbare Werken Aruba (DOW). Den e departamento aki Sra. Ing. Yvonne a diseña edificio di “Directie Luchtvaart” y e “Kleuterschool School Preparatorio Nos Paraiso” situa na Paradera. Tambe a traha riba mantencion di e edificionan di gobierno.
Den transcurso di aña monumentenraad a bin cu un proposicion pa lanta un departamento di monumento. Aki Sra. Ing. Yvonne Webb-Kock a hay’e hopi interesante y a pidi un cambio di trabou (overplaatsing) pa asina lanta e departamento di monumento y aki a bira directora di Monumentenbureau. Aki Sra. Ing. Yvonne Webb-Kock a traha 27 aña como directora na dicho departamento.
E prome proyecto di restauracion encabesa pa directora Sra. Ing. Yvonne Webb-Kock pa Monumentenbureau tabata restauracion di Stadhuis (Elloy Arends) hunto cu Hotel Colombia y cu e edificio nobo di Censo cu a bin (net entre) e dos monumentonan cu a conectanan cu otro. Otro proyectonan grandi cu a wordo restaura bou di e maneho como directora, Sra. Ing. Yvonne Webb-Kock, ta Ecury Complex caminda National Archaeological Museum Aruba ta ubica, e restauracion y expancion di e edificio di Corte (Gerechtsgebouw Aruba) situa na J.G. Emanstraat 51, esaki ta e proyecto mas gusta pa Sra. Ing. Yvonne Webb-Kock.
Ta sigui menciona un paar di monumentonan mas cu a wordo restaura bou guia di Sra. Ing. Yvonne Webb-Kock cu ta entre otro e edificio di ARA situa banda di Elloy Arends (Stadhuis), Henriquezpand situa na schelpstraat 36,38 cu actualmente ta e oficina di Monumentenbureau, Huisje Wild situa banda di Monumentenbureau, Vuurtoren (California) situa na Hudishibana,Cas Ceremonial pa Gobernador situa na Maria Christinastraat 2, Bestuurskantoor situa na L.G. Smith Boulevard 76, Watertoren playa y na San Nicolas, e grafnan colonial situa na diferente caminda na Aruba y asina por sigui menciona e proyectonan cu Sra. Ing. Yvonne Webb-Kock a lidera den nan restauracion y mantencion.
E Proyecto cu a hala mas atencion den nos comunidad tabata e mudamento di e cas di Aruba Bank cu tabata situa den caya grandi y awor ta den Weststraat, actualmente Patio 15 ta situa.
Durante e 27 aña como directora, mas di 60 miyon florin a wordo inverti pa restaura y mantene nos monumentonan.
Tambe Sra. Ing. Yvonne Webb-Kock a organisa varios Paseo Monumental, a fungi como mentor y guia diferente stagaire pa por studeeraf nan estudio.
Como conocedor di arquitectura di Aruba Sra. Ing. Yvonne Webb-Kock a duna varios biaha charla (lezing) na maestronan di scol. A representa Aruba diferente biaha den exterior pa por duna workshops tocante di nos herencia monumental. Semper porta tabata habri pa Media por haña un entrevista cu Sra. Ing. Yvonne Webb-Kock tocante nos monumentonan.
Sra. Ing. Yvonne Webb-Kock a prepara y propone e beslastingafrek y overdrachtsbelasting pa monumento cu a wordo hancra den ley.
Pa 27aña a fungi tambe como secretario di monumento (monumentenraad). Danki na e empeño di Sra. Ing. Yvonne Webb-Kock a lanta e interes di cuido di nos monumentonan na Aruba. Sra. Ing. Yvonne Webb-Kock ta wordo considera como nos experto den monumentonan na Aruba.
Coleganan di Monumentenbureau ta gradici Sra. Ing. Yvonne Webb-Kock pa su guía personal, laboral y tur locual e la logra hasi pa henter e comunidad di Aruba durante tur su añanan di servicio.
Monumentenbureau ta desea Sra. Ing. Yvonne Webb-Kock tur clase di exito den su etapa nobo den bida. Actualmente Sra. Ing. Yvonne Webb-Kock ta gosando di su vakantie y entrante prome di januari 2023 lo baha cu pensioen bon mereci yena cu trankilidad. Aruba y Monumentenbureau lo haya falta di Yvonne sigur, sin embargo e lus cu Sra. Ing. Yvonne Webb-Kock a sende lo keda briya pa Semper.
{gallery}Yvonne Webb-Kock, directora di Monumentenbureau ta baha cu pensioen{/gallery}
