Richenella Dorothal, directora di DTI:
ORANJESTAD (AAN) — Richenella Dorothal, director di Departamento di Inspeccion Tecnico (DTI), a reitera pa DIARIO, cu e formulario cu mester yena pa haci peticion pa pone luz riba caminda, ta oficial.
Dorothal a bisa cu por ta tin hende cu a yena uno den pasado caba, of un carta cu a manda minister, por pone esaki adhunto na e peticion y entrega esaki.
DTI ta bezig pa duna contesta aki un dos pa tres luna, despues di a entrega e peticion. E ta cana prome un proceso interno di inspeccion, opname, pa ricibi un acuerdo riba esaki y despues pa NV ELMAR ta keda un proceso tambe pa nan por ehecuta e proyecto, dependiendo di con grandi e ta tambe, y cuanto peticion tin.
E dama a bisa cu ELMAR tambe ta indica cu tin cierto areanan unda haci cierto testnan pa e parti di luz solar, pa wak con esaki ta bay. Esaki ta e proyecto riba su mes, pero aworaki ELMAR ta bezig cu diferente investigacion pa wak cual ta e miho tipo di luznan cu por uza tambe.
Tambe si e persona tin un palo den e cura di cas, e kier pone e luz, e mester haci e peticion na ELMAR mes, pa pone un luz y haci e conexion riba esaki. Esaki no ta den man di DTI pasobra tin biaha ta bay via e compania Elmar mes, y e factura ta core pa e parti di e ciudadano y e mester tin un areglo cu NV ELMAR pa cu esaki, Richenella Dorothal, director di DTI a informa.
