Director di Gele Koorts Muskieten Bestrijding:
ORANJESTAD (AAN): Director di Gele Koorts Muskieten Bestrijding (GKMB), Luis Chong, a duna di conoce den entrevista cu DIARIO cu ya desde luna di April, e matanan mangel na costa zuid ta trece sangura.
El a splica cu GKMB ta purba mas tanto evita esaki door di trata e awanan cu tin para y cu ta unda e sanguranan aki ta broei. Esaki ta bin mas tanto pa motibo cu lama ta cuminsa subi y te yena e mangrovenan.
Esaki ta un situacion conoci, e ta parti di Aruba, di naturalesa y tin cu djis yuda purba baha e molester pasobra semper e sangura aki ta bay keda. Ta un molester grandi, e ta pica hopi duro. E bon noticia ta cu e no ta transmiti dengue, pero si otro malesanan cu no tin na Aruba pero na Venezuela y cu si bin un hende malo, e lo por ocasiona un brote, a remarca.
Chong a sigui bisa cu problema di sushi tin tur caminda. Tin cu ta tira culpa riba dump cu a cera, pero prome cu dump a cera ya caba tabata wak e problema aki. E ta keda un problema principalmente ora ta tira sushi den barionan rond di e casnan. E sangura mester di hende y mester di awa. Un bes cu e tin e hende caba, e ta pica pa e haya sanger y e ta bay pone su webonan den e obhetonan aki cu tin tira rond di cas, den e barionan.
Finalmente el a expresa cu Bureau City Inspector ta haciendo un bon trabao pa señala e lugarnan aki, pero no solamente e ta crea un mal bista, pero e por trece problema pa salud.
