ORANJESTAD (AAN): Rulienne Arends, Trahador Preventivo di Fundacion Anti Droga Aruba (FADA) a laga sa cu no ta aworaki cu FADA ta na altura di loke ta e productonan di 'vaping' cu ta wordo uza na diferente scol aki na Aruba.
El a cuminsa na scolnan secundario, pero lamentablemente ya caba tin esaki na scolnan basico. Ta algo cu ya pa algun luna caba FADA ta purba di haci su banda pa concientisa pa loke ta e topico di 'vaping'.
A haya hopi scol ta yama pasobra nan ta preocupa. FADA ta duna e charla anteriormente di humamento unda cu nan ta papia di cigaria, pero tambe e parti di 'vaping'. "Pero mirando cu el a bira algo hopi normal bao di nos muchanan y hobennan, nos a adapta esaki cu nos tin full un charla y workshop di loke ta e tema di 'vaping' so, Arends a splica.
El a agrega cu hopi biaha e muchanan ta haci uzo di dje den areanan unda e docentenan no ta wak nan, por ehempel den baño. Tin hopi scol unda hopi mucha a ser gara caba ta uza e productonan aki, a remarca.
Ora di combersa cu e hobennan nan ta bisa cu nan a haya e producto na cas, mayornan a cumpra esaki pa nan of nan mes ta cumpra nan. "Ta algo cu ta hopi preocupante. Y no ta algo nobo. FADA tin un tempo caba papiando riba e tema di 'vaping', e representante di FADA a duna di conoce.
