Den futuro, FPNA lo enfoca riba prikichi
*E meta ta pa yega na un populacion sostenibel di 250 lora
ORANJESTAD (AAN): Durante un conferencia di Prensa, Giancarlo Nunes, Research & Conservation Manager na Fundacion Parke Nacional Aruba (FPNA) a elabora riba e proyecto cu ta andando aworaki caminda e meta ta pa yega na pone 250 Lora autentico di Aruba bek den medio ambiente.
El a bisa cu a reintroduci e prome 9 loranan den e naturalesa di Aruba. Un aña y mey pasa, un boto cu personanan indocumenta a drenta Aruba cu tabata tin lora ariba e boto. Pa medio di gobierno y boluntarionan cu a yuda a logra hinca e loranan bao di cuido di FPNA.
Segun Nunes, 33 lora a drenta y despues di 1 aña y mey tin 25 di nan ainda cu ta bay wordo reintroduci den naturalesa.
Tabata un periodo duro y largo. Mester a haci maneho pa loke ta nan salubridad, cuminda, remedi, training, entre otro. Tabata un programa completo cu ayudo di diferente persona.
Aworaki nan ta den Parke, tur e loranan cu 9 di nan bulando los, a bisa.
E programa di reintroduccion di lora ta parti di Parke Nacional Aruba, su programa pa rehabilita y reintroduci bestianan nativo den naturalesa di Aruba. Den futuro ta bay enfoca riba e prikichi cu ta un pahra cu tambe ta bayendo atras na Aruba, a indica.
Giancarlo Nunes a laga sa cu e intencion tabata pa cuminsa cu un programa di prikichi prome pero door cu e loranan aki a drenta a dicidi pa sigui cu e loranan aki, pone e prikichi riba un pauze, pero ta bay sigui cu e proyecto.
E intencion ta pa e loranan yega na un populacion sano den naturalesa cu por sostene su mes. Esaki ta nifica 250 lora cu ta bezig ta 'broed' den naturalesa. Esey ta e meta di FPNA pa futuro di yega na 250 pareha di lora cu ta reproduci den medio ambiente.
E ta un proceso cu ta bay dura su tempo. E loranan di tin aworaki ta un aña y mey bieu. E loranan ta cuminsa reproduci despues di 7 aña. E loranan aki mester sobrebibi pa basta tempo ainda prome cu nan reproduci.
Tin hopi peliger den parke, hopi peliger humano tambe, pero ta haci tur cos pa prepara e loranan aki pa nan por yega un edad cu nan por cuminsa reproduci, Nunes a duna di conoce.
El a agrega cu, c'un populacion di 25 lora pa purba yega na 250 pareha manera e intencion ta, ta hopi importante pa sigui traha cu e partnernan di Venezuela, Boneiro y di Merca pa wak si por trece Aruba loranan di afo.
