Aunke DIMP sa cu e deadline ta fin di Januari venidero
ORANJESTAD (AAN): Falta algun siman mas pa bay pa e deadline di Diabierna 31 di Januari 2025 yega. Pa aña 2025 tin un total di 92.835 number di auto y vehiculo registra. E bon noticia ta cu te Dialuna atardi cu a pasa, di e 92.835 numbernan, un total di 24.484 automobilista a haci nan pago di 2025 caba. Durante un conferencia di prensa convoca pa Departamento di Impuesto, e vocero Meverly Romano a splica cu esnan cu ya a paga 2025 ta representa un 26% di automobilistanan.
Pues tin 74% di ciudadanonan cu tin te cu dia 31 di Januari venidero paga, sino nan lo bay haya un boet automaticamente aplica riba nan cobransa.
Esey nifica cu 66.214 nummerplaat ainda falta pa wordo paga den e dianan nos dilanti. Pero experiencia ta siña cu no ta 100% lo bay haci pago, pues esnan cu ta cumpli lo bay yega como di 70% y sigui subi pa 80% mas o menos.
Publico tin di corda cu e periodo aki di Januari semper ta esun mas druk den aña na Departamento di Impuesto, pa procesamento di tur pago. Masha hopi hende ta paga via banco, y hopi tambe ta pagando na tur MFA y tambe edificio principal na Camacuri, pues esaki ta un periodo hopi ocupa y nan kier pidi automobilistanan cu tin di paga ainda, sigui e recomendacion di nan pa haci pago Online via bo banco.
E ta mas facil, menos preocupacion, y e banconan local tin sistema sigur di transferencia, djis corda menciona bo Persoonsnummer, menciona e periodo di aña cu bo ta pagando, y menciona e number di plachi corectamente, pa asina DIMP por procesa e pago corectamente. Si bo tin mas cu un auto, haci un transaccion online pa cada auto apart, pa asina e pagonan wordo procesa mas rapido na DIMP.
