Parlamentario Gino Goeloe:
ORANJESTAD (AAN) Parlamentario Gino Goeloe, den entrevista cu Matutino DIARIO, papiando ainda riba e tema di casnan di cuido di indole priva, pa nos grandinan, a subraya cu mester yuda e personal dunando nan e opleiding cu nan merece.
“Den e caso aki mi sa cu Xavier University a duna 16 persona cu ta traha den casnan di cuido priva y den SABA, oportunidad pa un opleiding di un aña y nan a haci’e. Mi a bay nan graduacion un par di luna pasa; 16 persona a haya nan diploma, danki na Xavier University cu a duna nan e curso por nada, na e personal aki di casnan di cuido priva y di SABA”, Gino Goeloe a enfatiza.
El a agrega cu e por a compronde di e Universidad menciona, cu lo bin 20 cupo mas e aña aki, pa duna e casnan di cuido priva y SABA e oportunidad pa haci e opleiding aki gratis.
“Atrobe danki na Xavier University p’esey, pero tambe gobierno di su banda, mester duna e parti aki. Tambe mi ta mira, a lo largo, AZV tambe mester carga cuido di Aruba. Mi ta bisa esey pasobra mundialmente, na Hulanda no e gobierno pero e seguro particular ta carg’e y mi ta kere cu na Aruba tambe e mester bira asin’aki. Ya tin rapportnan skirbi di AZV, SER, y aworaki mester tuma decisionnan, pasa nan den Parlamento, p’asina aki cuido haya su atencion debido”, Gino Goeloe a manifesta.
