Splica Pueblo di e companianan cu a acerca tempo di Gasunie --- *Acuerdo cu Eagle LNG a pone mula na careda den lamento
ORANJESTAD (AAN) — Wyatt a papia. Wyatt den mes tono cu Sneek tambe a papia. Desesperacion total!
Ora nos papia di Wyatt nos no kier meen e Wyatt cu un dia a pone Aruba den boca di pueblo rond mundo pa asunto di petroleo.
Nos no kier meen e Wyatt cu a kibra waya di areglonan Mericano y a rementa tuberia di noticia internacional.
Wyatt-Ras cu a bula for di MEP pa drenta despues den AVP NA 2013, awe a bini cu un storia di burico cu hende no por saca for di mundi.
Pa nos ta poco fastioco cu Wyatt-Ras ta mete burico den e asunto pasobra un burico sigur lo no a drenta AVP na 2013 ora Hulanda ya tabata prepara pa bin pone Aruba na candal estatal.
Comentario riba caya ayera tabata loke Wyatt a trece dilanti contra e proyecto Eagle LNG, cu a cera porta pa e e intentonan di Gasunie, Mike de Meza, WEB di AVP, Utilities di AVP, otro integrantenan di AVP y sigur Nicolas amigo di Mike & Mike.
Hopi ciudadano awor kier wordo informa di cual burico den cual mondi, Wyatt ta papia.
E confusion ta debi na e hecho cu tin hopi mondi na Aruba. Esaki a pesar di e hecho cu hopi mondi tambe a stop di existi y cu tin tereno cu tabata mondi ora nan a wordo entrega.
Tin ciudadano cu hasta a puntra si e mondi di cual Wyatt ta papia, por tin relacion cu terenonan di Gobierno cu a wordo entrega den e caso cu a pone Avestruz dera cabez den santo.
E mondinan di cual Wyatt ta papia, por tin relacion cu e caso contra Miembro di Parlamento di AVP Benny Sevinger? Tabata tin mondi y burico den e caso aki?
Aruba tin derecho di ricibi tur informacion.
Tin ciudadano tambe cu ta puntra si e buriconan ta den mondi pa mira kico ta pasa cu e tuberianan den cual gas lo mester pasa pa WEB, cu a firma acuerdo cu Gasunie y cu Utilities di AVP pa gas segun contractonan cu companianan, cu nunca a bira conoci
Ciudadanonan ta contento cu den e caso di Eagle LNG for di principio a wordo bisa ta kende ta interesa, ta kende ta trece gas y kende lo laga gas pasa den tubo.
Lo ta sumamente interesante pa sa si Gasunie lo a pasa gas den tubo cu mester a instala bou tera, loke lo a haci cu lo a trece gas ora ya Aruba conoce reactor nuclear.
Cual burico a keda den cual mondi? E buriconan tin nomber? E mondinan tin nomber? E buriconan aki ta na haltura cu tin caso Refineria di Aruba cu hopi placa den e aventura cu Nicolas Maduro?
E buriconan tabata tin permiso pa drenta Aruba?
Hopi pregunta a wordo lansa pa Wyatt contesta na ciudadanonan cu ta puntra nan mes, pakico a uza placa pa tram y no a saca burico for di mondi!