ORANJESTAD (AAN): 3D Escultura ta e siguiente workshop di un luna na Ateliers '89 Punto di Bellas Arte Aruba dirigi pa e artista maestro procedente di Hulanda, esta Maze de Boer. DIARIO a compronde cu e workshop lo ta cuminsando Dialuna 17 di April te cu Diahuebs 11 di Mei.
Por inscribi di awor caba y participa den un ambiente agradabel sin igual. Cu un oportunidad unico di ta participe den e exposicion final na unda cu kizas bo sa caba semper ta forma un tremendo exposicion di e obranan concebi durante e workshop aki sin igual. E workshop aki tambe lo ta di Dialuna pa Diahuebs di 6.30 pm pa 9.30 pm pa 1 luna largo. Pa inscribi manda email na This email address is being protected from spambots. You need JavaScript enabled to view it.
Hopi biaha obhetonan cu nos ta colecta ta determina nos alrededor. Bo por bisa cu e obhetonan den un luga ta parti di ken nos ta y ta di nos identidad.
Bo por bisa tambe di elementonan den un luga publico y tambe di cosnan cu nos ta haya riba caya? Kico ta e influencia di naturalesa rond di nos y di e elementonan cu nos mes a pone den dje?
Durante e tayer aki nos ta bay experimenta cu material di nos alrededor pa haya sa si nos por wak e di otro manera pa asina por crea experencianan nobo. Y ta delibera kico ta influencia di arte den un lugar publico.
A base di esaki nos ta bay traha cu Maze de Boer escultura- y instalacionnan cu lo por merece un luga den un espacio publico. E tayer ta interesante pa tur hende, pasobra e artista multidisciplinario Maze de Boer ta uza den su trabao diferente tecnica y material.
Maze de Boer a nace na Amsterdam na 1976 y a studia na Gerrit Rietveld Academie y na Rijksakademie di arte plastico. Como artista multidiciplinario e ta traha cu escultura, instalacion, arte di pinta, pelicula/video, fotografia y musica/zonido. Tambe e tin mas cu 150 solo exposicion y exposicion den grupo unda mundialmente el a tene esakinan den museo, galeria, biёnnales y festivalnan.
Como escenografo el a traha mas cu 50 diseño di decor, luz y video pa teatronan na Hulanda, China, Alemania y Belgica.
Aunke hopi biaha su obranan ta visualmente atractivo, nan tin un efecto di wega y ta accesibel. E obranan ta bira como sifuera atraccionnan a base di un idea.
