ORANJESTAD (AAN): For di 6 te cu 30 di November venidero, Ateliers ’89 Punto di Beyas Arte Aruba hunto cu Biblioteca Nacional,
lo ta organisando un workshop di pintura pa cuatro siman, bao guia di e artista hulandes Shani Leseman.
Esaki ta un workshop special pa alumnonan di Colegio, for di esnan di Brugklas te cu Klas di Examen. E bon noticia ta cu esaki lo ta completamente gratis bao di e proyecto di Ateliers ’89 Arte Den Bario, patrocina pa CEDE Aruba.
Por inscribi via Whatsapp na 661-8645, esta señora Romelinda Maldonado. Pa cuatro siman largo, riba Dialuna, Diaranson, y Diahuebs, for di 2:00 pm te cu 5:00 pm, lo tin e tayer aki.
Den e workshop aki lo tira un bista mas cercano riba e elementonan magico di bida diario, y ta explora loke nifica haci trabao for di bo intuicion, drenta den mundo di simbolo y descubri ki rol cierto obhetonan ta hunga den bo medio ambiente.
