ORANJESTAD (AAN): Señora Celsa Wever a bira miembro di Women’s Club of Aruba (WCA) na aña 1973 y
despues di a haci trabao di boluntario den comunidad pa mas di 40 aña y a yega e bunita edad di 80 aña, el a keda conmemora cu e titulo di Life Member na 2013.
En berdad Celsa no tabata miembro di directiva, pero el a tene su mes ocupa cu trabaonan di boluntario cu tabatin pa haci den e diferente comisionnan di club.
Semper Celsa tabata activo den e comision di mucha cu tabata bishita hospital pa lesa y conta storia na muchanan enfermo. Tambe pa organisa fiesta pa mucha- y hobennan cu tabata keda den Imelda Hof y of Casa Cuna. Y ora di celebracion of tripnan cu alumnonan di Bibito Pin, Celsa semper tabata t’ey! E tabata activo tambe den e comision di Keep Aruba Clean y den comision di nos grandinan, cu siguridad nos por a conta cu ne.
Ora di sali cu clientenan di FAVI, Celsa semper tabata cla pa duna un man. Pero su contribucion cu mas grandi y placentero tabata su obranan di man traha pa nos Christmas Bazaar, pa asina yuda recauda fondo pa su club stima, WCA. Hunto cu su amiganan di ‘Rusti Needles’ e tabata bin cu hopi obra di man masha bunita mes pa nos Bazaar. Riba e dianan, cu Ways & Means tabata tin Food Market, Celsa tabata t’ey di mes pa coopera cu cumindanan sabroso of snacks.
Celsa tabata un persona masha keto, di caracter suave, pero cu un amor grandi p’e comunidad di Aruba y a demostra esaki door di su boluntarismo den WCA y semper activo. Nunca el a nenga di bende rifa pa recauda fondo pa club y semper e tabata bisa: ‘mi lo haci mi best’.
Ata nos aki awe cu un curason tristo, pa tuma despedida di nos ruman den servicio di nos comunidad, señora Celsa Wever. Danki pa tur loke bo a haci y contribui durante tur e añanan como miembro di WCA.
Celsa stima, semper lo bo keda den nos memoria. Drumi dushi den brasa di nos Creador y te despues! Nos mas sincero condolencia na su yiunan y demas famia. Hopi forsa na boso tur den e tempo di luto aki y cu memorianan bunita lo trece consuelo pa boso.
