ORANJESTAD (AAN): Women's Club of Aruba a convoca un rueda di prensa y Milagros Posner a duna di conoce cu nan ta organisando un fundraising bingo dia 10 di April proximo.
El a indica cu nan kier encurasha comunidad pa yuda e organisacion cu e bingo cual ta hopi importante pa WCA por realisa su proyectonan.
Presidente di WCA, Norma Brinkenberg a splica riba nan proyectonan. El a laga sa cu e aña aki mayoria di e ganashi di e bingo lo bay pa bisti e muchanan.
A splica cu WCA ta un organisacion 'non-profit' y pesey nan ta depende di comunidad pa yuda nan bay dilanti.
'Dress a child' pa nan ta un di e proyectonan hopi bunita pasobra tin e oportunidad pa yuda e muchanan menos afortuna cu ta rond di 278 cu a yuda aña pasa. Nan ta mucha te cu 10 aña. Na final di aña nan a haya algo pa nan cera nan Pasco, a bisa.
WCA ta haya ayudo di varios otro instancia como tambe comerciante cu ta yuda haci e proyecto aki posibel. E ta un proyecto unda mayoria di nan miembronan ta yuda. Ta ricibi e muchanan na e tiendanan y ta yuda nan scoge locual nan ta gusta, a señala.
Sra. Brinkenberg a agrega cu e muchanan ta wordo bisti di pia pa cabez. Esaki ta e proyecto mas grandi pa cual nan ta recauda fondo aworaki.
Aña pasa a recauda 25 mil florin y ta spera cu e aña aki por recauda mas fondo pa asina por yuda mas mucha, a enfatisa.
Milagros Posner a splica cu e biaha aki nan a pidi cooperacion di Caribbean Bingo y Fundacion Pro Cultura Arubano. A planea e bingo pa otro siman diadomingo dia 10 di April y e lo pasa live pa 1 pm via e facebook page di Caribbean Bingo.
E booklet di bingo ta bay ta disponibel na diferente gasolin station.
