Gino Goeloe, director:
- Tabata J. Meelis a trece e prome zusternan di Asten cu a traha pa comunidad
ORANJESTAD (AAN) Director di Wit Gele Kruis, Gino Goeloe, den entrevista cu DIARIO tocante e di 65 aniversario di WGK sirbiendo comunidad di Aruba, a haci un comparacion entre WGK Belgica y WGK Aruba.
El a bisa cu WGK Belgica, cu su 700 empleado, no tin un “consultative bureau” pa baby. Nan tin mas di hende grandi, manera zorg hende muhe na estado, nan tin zorg transport, pero nan no tin nada mas. WGK Aruba tin hopi mas.
“28 di Juli 1959 Wit Gele Kruis a wordo funda door di tres cabayero cu e vision cu WKG mester para riba su mesun pia. Nan tabata señor W.de Graaf, señor J. Meelis, y señor E. Arends. Nan ta e tres personanan cu a funda Wit Gele Kruis, 65 aña pasa. Pero ya na aña 1942 tabata tin un grupo di Catolico na Aruba cu a bisa cu na Aruba mester bin cu algo pa cuida nos ancianonan, nos grandinan. Y eynan e bala a cuminza lora, na unda diferente sondeo a wordo haci na 1946 na unda cu a resulta cu mester di personal pa traha. Eynan señor Jan Meelis a bay Curacao, y a bay bisa nan cu nos kier para riba nos mesun pia, pasobra e tempo ey Curacao tabata dirigi Aruba”, Goeloe a trece dilanti.
El a sigui bisa cu asina e bala a sigui lora y dia 18 di Juli 1959 a logra. Ora Aruba a los di Curacao, a para riba su mesun pia, y esey ta algo hopi bunita. “Y mi tin cu gradici señor Meelis ya cu el bay Hulanda tambe, e temp ey. Pasobra cu ora el a bay Curacao, nan a bise ‘si pero bo mester hende pa traha tambe’ y Jan a bay Ciudad di Asten, na Hulanda, di unda cu el a bin cu Zusternan y Soernan cu a yuda Aruba e tempo ey. Y hasta mester bisa cu nan a traha por nada den tempo malo, sirbiendo nos comunidad”, Gino Goeloe, Director di Wit Gele Kruis a relata.
Un di e soernan cu tabata e prome hof zuster tabata Zuster Perpetua, unda cu el a pone e piedra di fundeshi Di Wit Gele Kruis, y asina aki WGK a sigui crece. Asina Gino Goeloe a conta.
