Jeanique de Palm ta orguyoso
- Awor por haya tur number di contacto
- Tur informacion balioso tey pa publico
ORANJESTAD (AAN): Un etapa nobo a cuminza pa Wit Gele Kruis na Aruba, como cu monton di informacion cu comunidad lo bay beneficia di dje, ta poni riba un website completamente nobo cu nan a caba di lansa.
Esey ta loke Jeanique de Palm, di Stichting Wit Gele Kruis Aruba (WGK) a indica na DIARIO. Nan tabata ocupa pa algun luna caba den pa a prepara, traha riba e logistica, y crea un imagen completamente nobo riba Internet.
Awor na un forma facil, por bay riba nan Website pa asina haya sa di tur servicio cu WGK ta duna, y bo ta haya ademas informacion importante, e.o. e email address di cada departamento, e numbernan di telefon, numbernan di WhatsApp.
Esaki a wordo haci, pasobra den pasado tabatin reclamo di hendenan cu ta considera dificil pa a haya comunicacion cu e departamento corecto. Pero riba e website awor, facilmente bo por yega na cada number directo, y asina conoce un tiki mas di e servicionan cu WGK ta duna.
No ta sccreto cu tin algun hende cu ta djis kere cu WGK ta duna e parti di cuido y e parti di baby so, pero riba e website nan ta amplia cu nan ta ofrece hopi mas cu djis esey. E website ta:
E website ta na Hulandes y Ingles, y den futuro lo bay amplia cu esaki cu idioma Papiamento y Spaño, pa e acceso yuda mas hende haya sa mas di e servicionan cu nan ta duna.
E motibo cu a cuminsa prome na Hulandes y Ingles, ta cu nan a nota cu ta ricibiendo hopi bishita di internet surfers di e.o. Belgica y otro paisnan di habla ingles, y pesey a dicidi na enfoca riba nan dos prome.
Pa e serviconan cu tin ‘cobransa’ envolvi, esaki no a wordo poni riba e website. Segun señorita De Palm, esey ta debi cu e prijsnan ta depende riba situacion di cada hende, y tambe si acaso e lo bay ta un tratamento regular, of ta djis un solo vez. Pero ora di yama e numbernan y bo splica nan di bo tratamento, e ora coordinador(a) lo quote bo un prijs.
E website sinembargo no ta menciona disponibilidad di rolstul of cama pa pashentnan. Segun De Palm, esey no a wordo poni riba e website, debi cu tin biaha demanda ta halto, y nan no por pone un conteo live si tin den stock of no. Sinembargo el a splica cu nan tin basta rolstul disponibel cu unavez bo yega eynan, kizas tin un wachtlijst di 1 of 2 dia, pero bo por haya uno. Pues aki ta cuestion di yama puntra, of bishita WGK, pa haya splicacion di e proceso.
