ORANJESTAD (AAN): Wind Creek Aruba CSR- Community Committee tabata tin e gran placer pa entrega 10 iPads na “Scol Inclusion”,
un scol cu ta traha cu diferente mucha y hoben cu un necesidad special.
E donacion aki ta parti di nan compromiso pa yuda promove educacion inclusivo y duna oportunidad igual na tur mucha y hoben.
Scol Inclusion, a wordo funda dia 8 di Januari 2024, y ta consisti di 10 studiante y 2 maestro cu ta traha boluntariamento. Durante nos bishita nos por a presencia e alegria y gratitud cu e studiantenan a sinti ora nan a ricibi nan iPad pa yuda nan cu nan lesnan diario.
“Scol Inclusion” ta duna guia y sosten personalisa pa su studiantenan, na diferente forma, manera: les di landamento, tennis, bowling, musica, cantamento, baile, drama, siña con pa lesa holoshi, con pa scirbi, lesa y rekenen, Tambe nan ta haya les di Ingles, les di pintamento y obra di man.
E scol su computernan no tabata funciona mas cual a hacie dificil pa e studiantenan por a haci cierto lesnan. Cu e iPad nan aki e situacion a wordo resolve y asina e studiantenan por continua nan educacion mas mihor.
Como cu un di Wind Creek Aruba su pilarnan ta pa duna bek na comunidad, nan ta contento pa contribui un biaha mas na un bon causa, y Aruba su comunidad. Educacion ta un parti hopi importante pa nos hobennan y tur tin e derecho pa haya e materialnan necesario pa haci esaki posibel asina Sra. Queta Werleman, Captain de CSR- Community Committee a declara.
