ORANJESTAD (AAN): Pandemia pa coronavirus a continua, apesar cu algun pais a canta su fin.
Ya esaki a afecta mas di 494 miyon di persona y a causa morto di mas di 6,1 miyon di persona. Desde december pasa, e variante di preocupacion Omicron ta esun dominante. Organizacion Mundial di Salud (WHO) a yama atencion riba combinacionnan entre variantenan, cu ta resultado di mezcla di dos variante of entre subvariantenan. Awendia e vigilancia di e variantenan ta clave pasobra esaki por influencia extension di e pandemia.
WHO ta siguiendo di cerca e combinacion di subvariante XE, cu ta un mezcla entre e dos subvariante di Omicron, BA.1 (cu a predomina entre november y februari na mundo) y asina yama ‘sigiloso’ BA.2 (cu a avanza durante ultimo lunanan). XE ya ta preocupa autoridadnan di salud.
Segun agencia sanitario di Nacionnan Uni, awe tin un predominio global di variante Omicron di coronavirus. Esaki ta basa riba 382.789 secuencia carga den plataforma GISAID cu specimen compila den ultimo 30 dia. Un 99,7% tabata muestranan di pashentnan cu variante Omicron. Solamente 0,1% tabata Delta, y 649 secuencia no a wordo asigna na un linahe Pango (0,2%).
“Mester tene na cuenta cu distribucion global di variantenan di preocupacion di coronavirus mester wordo interpreta segun limitacionnan di vigilancia, incluyendo diferencia den capacidad di secuenciacion y strategia di cada pais, como tambe retraso den notificacion. Ademas, ta posible cu algun pais ya a cambia nan politica di analisis y secuenciacion”, segun WHO den nan boletin semanal.
Cada siman expertonan ta realiza un proceso di evaluacion di riesgo di variantenan cu awo tambe ta inclui combinacionnan. Desde e actualizacion epidemiologico publica dia 22 di maart di 2022, no tin pruebanan nobo cu ta indica cu variante combinante asigna na linahe XD, cu ta un combinacion di Delta y Omicron, ta asocia cu mas transmision of resultadonan mas grave.
XE (un combinacion di BA.1 y BA.2) a wordo detecta pa prome biaha na Reino Uni, dia 19 di januari. Desde e fecha aki, a registra y confirma mas di 600 secuencia.
WHO a indica cu nan lo sigui vigila y evalua e riesgo pa salud publico asocia cu variantenan cu ta desaroya, specialmente den casonan cu esaki ta yega na un combinacion y mutacion cu otro variantenan di coronavirus SARS-CoV-2, y lo proporciona informacionnan na medida cu nan haya mas pruebanan.
Algun experto den virologia y genomica no ta kere cu XE ta mas grave of resistente na vacunanan compara cu otro tipo di subvariante di Omicron.
XE no ta un leter griego cu ta wordo designa na un variante nobo di interes. E ta apenas un combinacion di subvariantenan Omicron, e di cinco identifica, despues di XA, XB, XC y XD. E conseho si ta pa sigui e mesun precaucionnan contra COVID-19 en general.
