Haya sa pakico: --- MENLO PARK: E aplicacion di manda mensahe Whatsapp cu tin mas di 2 mil miyon di usuario, tin intencion di bin cu algo nobo:
E di tercer haak blauw (‘blue check’ na ingles y ‘churo azul’ na spaño).
E publicacion di ‘Entrepreneur’ a divulga cu e ta un posibilidad cu e desaroyadornan a analiza, pues esey nifica cu ainda no a duna ningun detaye oficial si acaso nan lo bin cune of no, y tampoco no a bisa ta ki tempo lo introduci esaki.
Tin di corda cu en realidad ta existi tres tipo di haak:
- Esun shinishi ta djis indica cu e mensahe a wordo manda, pero no ricibi.
- E double shinishi, cu ta indica cu e mensahe ya a wordo entrega na su destino.
- E double blauw cu ta mustra cu e persona a lesa e mensahe.
Ademas di tur esaki, nan kier introduci tres haak blauw, pasobra e compania cu ta pertenece na Mark Zuckerberg ta buscando forma pa mehora seguridad y privacidad di e combersacionnan di e hendenan, cu ta un di e puntonan mas critica.
Pa esey, e di tres haak blauw lo notifica bo, si algun di e personanan involucra den e chat a haci un asina yama screenshot, esta captura di pantaya.
Segun e rumornan, e di tercer haak blauw lo ta disponible tambe pa Groupchats. Esey nifica: Si un di e usadornan haci un screenshot di e pantaya den e Groupchat, tur e hendenan den e chat aki lo wordo notifica di esey. Door di primi ‘Info’ nan lo haya sa tambe kende ta esun cu a haci e screenshot.
E herment nobo aki ta busca pa duna tur hende na mundo, un control mas grandi riba nan combersacionnan. Bo ta sigur awor cu bo chat ta mas priva. Si acaso e otro persona ta haci screenshot, mesora lo bo por compronde cu bo chat ya no ta safe ni priva mas.
Mientras tanto Whatsapp a bisa tambe cu nan ta haciendo cambio na e sistema di manda Voicenote. Esta cu prome cu bo ‘send’ esaki, bo tin chens di scucha bo mes un biaha mas prome cu bo mande. Si acaso e no a graba bon, bo por djis primi e icon di baki di sushi, pa delete e file, y graba di nobo uno mihor. Hasta bo por stop mey-mey di bo grabacion y delete esaki. Pasobra antes asina cu bo laga boton di Voicenote, ya e ta wordo transmiti, cu eror of no.
Cambionan cu lo haci bo bida mas safe, y ademas lo bo haya sa ta kende ta esun cu cada rato ta screenshot bo combersacionnan.
