Dolor di comercio Hulandes ta ilustra kico ta “hybride” den Reino
*Hecho cu Aruba por paga debe y interes ta prueba di bon gobernacion
*Rutte a sostene morto di Florin y Knops a declara Aruba bancarota
ORANJESTAD(AAN)—“Hybride”ta un palabra dificil pero cu ta simplemente basa riba e realidad den Reino Hulandes cu ta basa riba union entre hasta continentenan y clima na mundo.
Ta e diferencianan grandi cu ta uni henter e Pueblo di Reino Hulandes na un forma unico cu otro, a haci Statuut uno di e mihor areglonan pa relacionnan entre paisnan completamente diferente, posibel.
E actitud basico y filosofico di gobernantenan na e diferente partinan di Reino, ta ilustra, e diferencia den mentalidad na cada parti di Reino.
E diferencia di loke un ciudadano ta spera na e diferente paisnan den Reino di su gobierno, sigur por wordo ilustra na un forma directo cu un problema serio na Hulanda actualmente, cu ta e dolor di e sector empresarial cu a haya yudansa financiero di Gobierno Hulandes ora Covid-19 a ataca.
Na Aruba tambe, asistencia di Gobierno den e caso aki Wever-Croes, a haci cu trahadornan por a keda cu nan entrada aunke poco menos y cu comercio por a keda na bida hasta ora mester a dal porta comercial cera, pa scapa bida di hende.
Na Hulanda, empresarionan cu a ricibi asisencia di Gobierno, mester atende cu Deurwaarder cu ta exigi pago di e debe.
E gastonan enorme cu e pandemia a nifica pa Aruba mescos cu pa henter mundo, a haci un prestamo importante necesario ya cu Aruba no tabata tin ningun reserva.
E hecho cu Aruba no tabata tin reserva a wordo ocasiona dor di abuso di placa di Pueblo di Aruba dor di Mike Eman, cu a manipula cu sentimento di Pueblo na un forma tan sublime, cu hasta ora el a destrui Florin y asina situacion financiero di Aruba, na 2013 el a haya oportunidad di Reino, pa e gana eleccion na forma aplastante.
Ta ora el a gana eleccion, den medio di benta di tereno di Pueblo cu awe ta yena Prison di Aruba entre otro y abuso di su posicion, Hulanda na 2014 a cuminsa actua.
“Masha tanto cos ta pasa aki riba,”tabata parti di e elogio di Prome Ministro Rutte di Hulanda na Mike Eman na 2013 pa na 2014 Plasterk a baha Mike Eman for di Fort Zoutman!
Na 2013 Prome Ministro Mark Rutte tabata na Aruba pa canta alabansa di e maneho di Mike Eman, cu despues el a somete na supervision financiero y destruccion di autonomia.
Con importante autonomia financiero di un pais ta, ta bini dilanti den e realidad cu sin placa hende no por haci nada, manera Aruba tambe a ripara, ora Covid-19 a bati e pais.
Tabata Evelyn Wever-Croes cu mester a scapa Aruba di estado di bancarota, cu mester a guia e pais na un destino nobo den cual Covid-19 lo a hunga papel importante ya cu Covid-19 a pone hasta Hulanda y Estados Unidos entre otro, na careda pa financia nan bida normal.
Na momento cu Reino a permiti Mike Eman destrui stabilidad di Florin Arubano, Mike Eman a priminti cu Aruba lo paga e debe cu orguyo.
Kico a pasa cu orguyo ta e pregunta grandi awor cu destino a haci cu na momento cu Aruba tabata tin un saldo favorabel na man di Evelyn Wever-Croes, Covid a forsa Aruba yega na un prestamo di 500 Miyon cu Hulanda, cu awor mester wordo paga.
Na mes momento, despues cu Mike Eman a huy di bista di votador na 2017 ora el a perde eleccion, Hulanda ta exigi supervision financiero di Aruba, cu ta algo cu mester delibera pa evita cu e ta mishi cu e autonomia di Aruba, cu despues di supervision entre otro, sin mas lo no por dicidi cu e ta crea fondo pa asisti ningun grupo di poblacion cu ta den problema financiero ni ora pandemia bati na porta.
Prome di September a base di inhusticia di e realidad cu Gobierno ta basa riba continuacion, mester a bira dia, cu tambe causantenan directo di e drama financiero di Aruba, lo por a haci bofon di e bon trabou di Evelyn Wever-Croes.
E siman aki, sinembargo, a yega na un acuerdo temporal, mientras ta sigui negocia na mesa pa mira si den futuro e interes cu Pueblo di Aruba mester paga riba e debe na Hulanda, por baha.
Mientras un crisis mundial ta bati na porta di mundo atrobe, Aruba y Hulanda lo sigui na mesa pa mira con lo por yega na un solucion “hybride”cu ta un solucion cu ta tene na consideracion e realidadnan opuesto entre Aruba y Hulanda, cu ta confronta cambionan grandi den mundo politico y gubernamental!
Porta pa sigui negocia a keda merecidamente habri pa Evelyn Wever-Croes, cu merece aplauso den Reino pa e forma cu el a goberna Aruba den horcan financiero y economico causa pa Mike Eman, manera historia skirbi di Reino Hulandes ta proba.
