Magaly Brito Secretario General SEPPA:
*Nan salario ta 2040 florin: un par so ariba minimum loon
ORANJESTAD (AAN) – Magaly Brito, Secretario General di Sindicato di Empleadonan Publico y Priva di Aruba (SEPPA), den entrevista cu DIARIO a duna di conoce, cu e empleadonan di limpieza di scolnan (werksternan) no a haya indexering.
“Nos a compronde for di diferente fundacion, cu nan no a haya e fondo ainda. Algun di nan a pon’e di nan mesun fondo te na unda cu por, pero no cu nan a haya e fondo mes ainda”, Brito a señala.
El a sigui bisa cu pa loke ta e werksternan di SKOA tin un tema basta particular, pasobra SEPPA tin un aña na Corte cu e tema aki. “Ora cu e minister di e tempo ey a bin p’adilanti bisa cu e trahadornan aki mester bay bao gastonan di explotacion, pero cu tempo e trahadornan aki a genera derechonan, y nos ta insisti cu indexering ta un di nan, mescos cu e trahadornan di gobierno y den e caso aki gobierno mester pone fondonan extra y nan mester hay’e mesun cos”, Magaly Brito a señala.
Kico a sosode aworaki, no ta mucho duidelijk. Di banda di SEPPA e peticion di e trahadornan ta pa nan busca informacion necesario na SKOA, p’asina, si en dado caso no tin cumplimento, nan tin cu bay di nobo den Corte.
“Di otro banda, nos ta kere cu e Minister di Enseñanza mester bin, na cierto momento, mester bin pone e cosnan dilanti, hopi cla, y compronde cu e trahadornan tin derecho y pa e derechonan aki mester pone fondo disponible. Mester yega na un entendimento, den e caso aki cu e fundacion p’asina aki e trahado por haya e ahustacion manera mester ta! Costo di bida a dal tur trahador y sigur e trahadornan aki cu ta esnan humilde, vulnerable, cu salario hopi abao. Nos no ta papiando di salario halto: 2040 florin ta apenas un par di florin ariba di minimum loon, pa un trabao duro cu nan ta eherciendo.
