Segun Minister Geoffrey Wever:
ORANJESTAD (AAN)—Pa cuminza e ronda di pregunta di e conferencia di prensa di Minister Geoffrey Wever, relaciona cu e lanzamento di e website di SEDECO, DIARIO a haci e observacion cu segun cifranan estadistico, na Aruba tin 60 mil persona 60 plus, y su pregunta ta si lo por tin otro plan pa e consumidornan adulto mayor, pasobra hopi di nan no ta domina e tecnica di computer y WhatsApp.
E mandatario a contesta cu enberdad e prome salida aworaki ta e website na Hulandes, pero e di dos paso ta pa e bay completamente na Papiamento. No obstante, e idea ta cu esaki ta bay wordo combina cu un campaña di mercadeo.
El a bisa cu e ta compronde cu tin ora e informacion ta complica, ora ta subi e website no tur cos ta hopi facil pa compronde, pasobra e ta trata di ley. E idea ta pa sali cu un campaña di mercadeo, cu videonan cu lo pone tur siman unda ta zoom riba cada elemento di e derecho di consumidor, y purba di educa y concientiza tur ciudadano na Aruba, no solamente e personanan 60 plus pero tambe tin otro grupo cu kizas e materia aki ta complica pa nan y cu nan tin identifica caba.
E idea ta, el a reitera, pa trece na un forma mas accesible y mas comprendible. Sigur esaki ta den e planning, y nan ta haciendo hopi cos pa e consumidor, y poco, poco lo divulga nan.
