E berdadero motibo di blackout...
ORANJESTAD (AAN): Segun un boletin emiti door di WEB Aruba NV, cu ta hopi mas laat despues di un conferencia di prensa, nan ta bin splica cu e problema grandi na e planta ta logra ‘sincronizacion’ di tur e diferente planta di RECIP cu ta draai na nan lugar na Balashi.
“E blackout di diasabra 5 di november ultimo to ocasiona pa un fayo den e sistema di control di motornan RECIP,” ta loke e boletin oficial ta menciona.
Segun WEB, por categorisa e sistema di control como un “sistema automatiza” cu ta dirigi funcionamento di e planta nobo, RECIP Fase IV. E planta nobo to integra cu plantanan existente di RECIP Fasenan I, II y III.
Pa e motibo aki e fayo tabatin su efecto riba control di e produccion di energia cornpleto, cual a conduci na un blackout cu duracion di como 3 ora. WEB ta den contacto estrecho cu fabricante Wärtsilä pa haya asistencia.
WEB Aruba NV ta pasando den un proceso di transicion di produccion cu generadornan di turbina di vapor, pa un produccion cu motornan RECIP. Motibo di esaki to cu plantanan di motornan RECIP to mucho mas eficiente.
Un tiki mal noticia: “Ta premira cu por keda surgi interupcionnan durante e proceso di transicion aki.”
Nos isla e aria aki a conoce un serie di blackout a consecuencia di integracion di e planta nobo den e plantanan existente. E blackoutnan ta ocasiona pa fayonan cu ta ocuri durante e proceso di integracion. E integracion ta encera sincronisacion di diferente sistema automatiza pa yega na un bon operacion di tur e unidadnan di produccion. Ta trata di diferente aplicacion cu mester coordina e funcionamento di plantanan nobo y existente debidamente.
Durante implementacion di e planta RECIP fase IV, hunto cu fabricante Wärtsilä a haci e debido testnan den cada fase di ehecucion. Sinembargo, awor cu e planta nobo ta den operacion ta surgi fayonan cu no por a premira durante e fase di implementacion of cu por a surgi durante e integracion di e automatizacion di e sistemanan.
Ta trata aki di aspectonan di automatizacion hopi complica y hopi biaha scondi, cu ta bini dilanti awor cu e planta nobo ta opera via e mesun sistema di control cu e plantanan existente. Ta integrando sistemanan di automatizacion nobo suministra door di Wärtsilä y alavez ta upgrade e sistemanan mas bleu pa por traha y comunica cu e sistema nobo di Wärtsilä. E trabou aki ta rekiri cu e sistema ta 'live' ora di haci e integracionnan. E trabaonan compleho aki ta bini cu nan riesgonan operacional. E hecho cu Aruba ta un isla y cu no por haya backup di otro paisnan, manera ta e caso na otro continentenan ta haci e situacion mas dificil.
WEB ta hopi consciente di e impacto cu interupcion di coriente tin riba bienestar di comunidad y economia di Aruba. P'esey ta sigura cu ta duna prioridad mas halto pa revisa sincronizacion di e sistemanan di control di su plantanan mihor y mas liher posibel.
