Tesis encuanto funcionamento di planta di awa na Aruba
ORANJESTAD (AAN): Pabien na stagiaire, Ilaiza Croes, ca defende su tesis cu exito na Breda, Hulanda titula, ‘Impact of Feedwater Quality on SWRO-2 Performance”.
DIARIO a compronde cu Ilaiza a core su afstudeerstage na WEB Aruba NV den e departamento di Enterprise Risk Management (ERM) den luna di Februari te cu Augustus 2024. Despues di defende su tesis, Ilaiza a ricibi e noticia emocionante cu el a gradua di Avans Hogeschool. Pues el a obtene su Bachelor den Environmental Science.
Como parti di e examencommissie y cu invitacion di Ilaiza, algun funcionario di ERM di WEB Aruba NV tabata presente pa e defensa di Ilaiza su tesis na Hulanda.
Departamento di ERM a gradici coleganan di e varios departamentonan di WEB pa e caluroso bonbini cu a duna Ilaiza y e hopi bon cooperacion cu a contribui na su logro. Na final, Ilaiza a expresa: “Danki na tur colega di WEB y tambe pa ta presente na un momento asina grandi den mi bida. Semper mi lo aprecia esaki.”
