Desde e aña aki el a drenta na vigor
- El a demostra hopi util durante un situacion na luna di Mei cu a pasa
ORANJESTAD (AAN): Manera cu DIARIO a trece dilanti siman pasa, ta asina cu e hunta di Aruba Hotel & Tourism Association (AHATA) a reuni cu directiva di Water- en Energiebedrijf Aruba N.V. (WEB) pa un discusion habri y transparente tocante e topico importante di demanda creciente di electricidad riba e isla y capacidad di e planta estatal.
DIARIO awor a entrevista Director Alfredo Koolman di WEB Aruba NV, kende a mustra cu e reunion cu AHATA tabata importante, mirando cu nan ta un di e partnernan strategico pa e isla. Durante e encuentro, WEB a duna un splicacion detaya di e capacidad actual pa produccion di electricidad, tur e desaroyo cu a conoce ultimo tempo na e planta, e proyeccion di e demanda di coriente den futuro, y nan ideanan y plan strategico pa por cubri cu e demanda aki den e añanan benidero. Tambe a papia di e retonan energetico riba e isla.
E director di WEB a splica cu nan tin basta bon cooperacion cu Hotelnan recientemente, cu ta forma parti di un Plan Total cu a wordo introduci, pa evita cu Aruba tin di bay den proceso di “Load Shedding” den casonan ora cu produccion di coriente ta debil. Esey ta conoci den pueblo como rotula suministro di coriente cada tanto ora pa cierto barionan.
Koolman a bisa cu e Plan Total aki cu e Hotelnan, ta algo cu a nace for di comienso di aña caba caminda ta ricibiendo bon cooperacion debi na demanda halto cu tin aworaki riba e isla pa consumo di coriente. Esaki ta notabel desde Mei 2023 caba, ora demanda a subi entre 10 pa 15%.
Consultando cu Hotelnan na Aruba, a logra di haya varios dato importante cu ta encera operacion di cada empresa, di forma cu WEB por a usa e datonan pa “proyecta” y bin cu modelonan pa haya un bista kico lo bay socede cu e demanda di energia riba e isla.
E cooperacion a cristaliza caba na luna di Februari 2024, y den e contacto cu Hotelnan, na luna di Mei 2024 ora cu diripiente tabatin limitacion di capacidad na planta na Balashi debi na un candela na unidad di RECIP. Ademas di notifia pueblo, a contact e Hotelnan tambe pa asina mira si nan por reduci nan consumo un poco. E asina yama “Demand Site Management” di parti Hotelnan, a bira hopi balioso. Koolman ta aprecia e bon cooperacion di Hotelnan, y a bin observa asina cu den oranan di ‘piek’ anochi entre 6:00 pm y 10:00 pm, net ora cu no tin suficiente capacidad, aki mesora ta pidi cooperacion di Hotelnan via e protocol, unda ta pidi pa e Hotelnan start nan generator di forma cu por disminui nan consumo, y asina WEB por maneha e situacion sin cu nan tin di bay desconecta (‘Load Shedding’).
Algun siman pasa e sistema aki a funciona basta bon, y a duna resultado.
Koolman a indica cu e debilidad den produccion a pone cu a manda busca extra Generators cu ta bin Aruba den Generator-Containers di compania Bredenoord di Hulanda, pa asina yuda alivia e ‘piek’ di demanda na September y October venidero, na momento cu hopi biaha no tin biento pa haya yudansa di Parke di Molina pa genera coriente. Pa Augustus venidero e Generator-Containers aki lo mester ta operacional y conecta riba e grid di WEB Aruba NV, yudando cu extra 20 MegaWatt di electricidad.
E dialogo entre AHATA y WEB tabata positivo y constructivo, cu gran enfoke riba posibel solucionnan y riba colaboracion durante momentonan critico. Specialmente awor cu Aruba a conoce un gran crecimento economico via di Turismo. Tambe WEB Aruba NV ta considera e aumento di temperatura promedio, como un factor importante cu ta impacta produccion di energia.
Pa futuro, WEB ta mirando riba proyectonan di ‘Bateria’ tambe, y a papia riba busca 2 motor RECIP mas pa yuda planta na Balashi. Koolman ta sigui kere si, cu Aruba tin di sigui haci bon uso di genera coriente cu Molina di Biento y tambe Solar Panel, como cu e isla aki su porcentahe di iluminacion di solo cada dia ta basta bon.
