Director di WEB Aruba NV:
ORANJESTAD (AAN): Recientemente, durante un conferencia di prensa, Director di WEB Aruba NV, Alfredo Koolman, a trece dilanti algun informacion pa loke ta trata e situacion financiero di e compania di utilidad.
El a indica cu WEB Aruba NV na 2022 tabata tin tardansa cu e introduccion di tarifanan nobo cu mester a cubri e gastonan na 2022.
Loke nan ta recobrando awor ta necesario mirando tur e inversionnan cu WEB Aruba NV tin cu haci den e siguiente añanan, a remarca.
Koolman a menciona otro proyectonan cu tin interes pa nan. Un di nan ta e proyecto di LNG. WEB Aruba NV ta haciendo preparacion pa por ricibi LNG. Ta haci esaki den consulta cu Eagle LNG. Nan mes tin nan proceso, entre otro pa yega na e permisonan necesario pa construccion.
El a agrega cu pa loke ta trata e proyectonan di energia renobabel, di biento, solo of bateria, esey ta haya atencion di WEB Aruba NV y ta hacie hunto cu nan stakeholdernan Utilities Aruba y Elmar.
Pa loke ta e situacion di 'hedging', a indica cu pa aña 2023, a 'hedge' tur e volumen di azeta cu nan ta uza den nan planta pa 2024 por 'hedge' 50 % di e volumen di azeta y ta buscando oportunidad pa 'hedge' e restante 50 %.
