ORANJESTAD (AAN) – Parlamentario Darlaine Guedez-Erasmus, den conferencia di prensa di fraccion di MEP a referi y elogia e proyecto di WEB Aruba NV, di bin cu meternan pre-pago.
Guedez-Erasmus a comenta cu como un persona cu a sali for di e veld social, por a ripara cu hopi famia na Aruba tin hopi dificultad cu e servicio di awa, cu ta un necesidad basico, y hopi biaha ta pidi ayudo pasobra e compania a kita e awa. Esaki, Guedez-Erasmus ta señala, ta un preocupacion grandi pa cada famia.
“Pero mi ta hopi contento di tende cu WEB Aruba NV, e luna aki lo bin cu un proyecto piloto, pa asina por brinda e comunidad un otro servicio den e suministro di awa. E ta hopi importante pa meternan prepago yega na Aruba, manera nos ta mira cu internacionalmente hopi pais ta haciendo esaki caba. Esaki sigur ta un bon solucion pa Aruba tambe, pasobra ta importante pa tur famia tin awa den nan cas”, e parlamentario a subraya.
E dama a agrega cu e proyecto piloto aki ta cuminza entre fin di Mei y comienzo di Juni. Ta bay tin 500 cliente cu lo por participa den e proyecto aki.
WEB Aruba NV mes lo tuma contacto cu e clientenan pa asina por participa. “E proyecto aki lo tin criterianan poni na dje, vooral den e parti di infrastructura. Esaki lo trece hopi beneficio pa pueblo di Aruba; sigur ora nos mira cu e consumo di awa lo baha drasticamente y lo tin un miho control tambe di e gasto di awa, entre otro beneficionan cu lo trece cune” e Parlamentario a bisa.
El a reitera cu, como Parlamentario, e ta hopi contento cu e proyecto aki “Esaki ta trece un positivismo tambe, y ta un necesidad basico pa tur hende na Aruba y rond mundo”, el a expresa.
E dama a agrega cu pesey el a dicidi di difundi e informacion aki, pa hendenan keda pendiente si acaso WEB ta yama nan, y tambe pa encurasha esnan cu den futuro, lo kier instala un meter di awa pre-pago y tambe pa e keda informa riba tur e desaroyo di e proyecto aki. Tambe por subi e pagina web di WEB Aruba NV pa mas informacion.
