ORANJESTAD (AAN): Durante un encuentro ameno na planta di WEB Aruba NV, gerencia a felicita e team di SV WEB cu e teamwork excelente cu organizacion di WEB su Family Day.
Na e ocasion aki, gerencia di WEB a entrega un aparato asina yama ‘defibrillator’ na miembro di SV WEB, Gregorio Rasmijn, cu tin un Certificacion Anremt EMS desde aña 2008.
Gregorio, kende ademas di eherce su funcion como Schakelbordwachter na WEB tambe ta haci trabao boluntario como un ‘Emergency Medical Technician’ (EMT). Gregorio a ripara un aumento den casonan cardiaco y e necesidad di e aparato. Pues, a haci un peticion pa un ‘Automated External Defibrillator’ (AED).
Un defibrillator ta un aparato cu por salba bida di un persona cu ta experenciando un atake di curason. Den situacion di emergencia un defibrillator ta aplica un carga di coriente na e curason di e victima pa purba reanima e ritmo normal di e curason. Un aparato cu sigur lo brinda un miho calidad di prome auxilio den situacionnan di emergencia cu por presenta na WEB Aruba NV.
Sigur un danki na Gregorio pa su bon trabao, gradicimento na gerencia pa e donacion di e defibrillator y SV WEB cu a asisti cu e peticion.
