*No perde e oferta excepcional riba ekipo di cushina industrial
ORANJESTAD (AAN): Pa esnan cu tin un restaurant, food truck, compania di catering, of ta bay habri uno pronto y bo ta buscando ekipo di cushina industrial di calidad halto y pre-usa? No perde e oportunidad di haci bo compras na e Stimami Sterilisami Warehouse Sale cual lo tuma lugar diabierna 27 di Februari na Engelandstraat 5 (dilanti di Martijn Trading y banda di Coastal Crafters), for di 8:00 di mainta te 1:00 di atardi, of te ora tur mercancia wordo bendi.
Un seleccion amplio di ekipo di cushina industrial di calidad halto, pre-usa, cual a generosamente wordo dona door di e resort renombra, Bucuti & Tara Beach Resort, y su restaurant, Elements Restaurant, lo ta na benta y tur fondo lo bay na Stimami Sterilisami su programa nacional di sterilisacion di cacho y pushi. Cu prijsnan atractivo y un variedad diverso di articulonan, e evento aki ta ofrece un oportunidad excelente pa restaurantnan, cafes, food trucks, hotel y otro negoshinan incorpora ekipo valioso pa fortalece nan operacion.
Ta importante pa nota cu e articulonan ta di grado comercial y destina pa uso profesional, no pa cushina regular domestico.
Informacion importante pa cumpradonan
Clientenan cu ta cumpra ekipo grandi di cushina lo mester por move e articulonan nan mes y organisa nan propio transporte, ya cu e organisadonan no lo por asisti cu move ni entrega. Ta importante pa nota cu e articulonan ta di grado comercial y relativamente pisa. Tur articulo cumpra mester wordo retira durante e orario di benta, ya cu nos no lo por warda ningun articulo pa busca despues. Tanto pago cash como pago cu tarheta lo wordo acepta.
Sea parti di algo significante
Cada compra realisa durante e benta ta duna sosten directamente na e programa nacional di sterilisacion di Stimami Sterilisami, cu ya a logra mas cu 47,000 sterilisacion di cacho y pushi rond desde 2016. Na 2026, e iniciativa vital aki ta sigui avansa danki na e generosidad di nos sostenedonan, e compromiso di nos boluntarionan y e apoyo continuo di nos comunidad. Cada compra ta yuda di un manera mas humano reduci e cantidad di animalnan sin cas riba isla y ta sostene un Aruba mas saludabel y cu mas compasion.
