Den lama cerca di Aruba
- Speedboat cu droga y tripulantenan a bolter
- Tur cinco venezolano a keda deteni
ORANJESTAD (AAN): Tabata Dialuna den oranan di marduga, cu radar di Wardacosta di Caribe Hulandes a detecta un boto moviendo den direccion di Aruba.
Inmediatamente a manda dos unidad di Metal Shark di Wardacosta pa subi lama y bay intercepta esaki. Na mesun momento a laga e avion Dash-8 di Wardacosta subi vuelo pa asina vigila tur esaki for di halto.
Ora cu e speedboat a mira cu Wardacosta ta yegando cerca, nan a djis nabega duro pa asina trata di huy. Pero cada Metal Shark tabata move stabil den nan direccion, y di leu tabata mira cu tin 5 persona abordo.
Speedboat a bolter: E dianan aki biento fuerte den Caribe tabata trece lama basta bruto, y den un ocasion inespera, e speedboat a dal den ola grandi, y esaki a pone e speedboat bolter, y tur hende y contenido a bay den lama.
Oficialnan di Wardacosta semper nan prome prioridad ta pa saca e 5 persona for di lama. Despues a pasa y ‘pisca’ e bultonan cu a keda drif riba lama. E speedboat si a keda destrui, y e condicion ey no a permiti pa nan sak’e di lama, y tampoco pa lastr’e pa trece tera.
Despues di a sigura tur e persona nan hunto cu e bulto nan, a logra di transporta nan tur y hiba nan base di Wardacosta.
A inspecciona tur bulto presente y a constata cu ta trata di un cantidad grandi di droga. Lamentabelmente Wardacosta no a informa di e peso.
E 5 persona abordo tabata di nacionalidad Venezolano y e droga, a ser entrega na miembro nan di Cuerpo Policial. Entretanto a destrui e droga, pero e investigacion lo sigui.
