KRALENDIJK: Den oranan di mainta, Wardacosta di Caribe Hulandes a ricibi informe cu un piscado ta confrontando problema riba lama, pabao di e Salt Company na Bonaire.
A logra cu Maritieme Multidisciplinaire Hub Bonaire (MMHB) a core saca dos boto special, esta ‘Interceptor’ y tambe ‘Kinikini’ cu a move rapido pa e lugar. MMHB ta un cooperacion entre Polis, Wardacosta, Marechaussee, Ministerio Publico Bonaire, y Aduana.
Ora cu nan a yega, nan a mira cu e boto di piscado ta drief, y e piscado mes cu ta un adulto mayor, ta den awa y ni maske kico e purba, e no por a subi bay bek den su boto. Esey ta debi cu ya e tabata demasiado cansa.
Autoridad mesora a tira un salbabida pe, y cu esaki a yuda hise abordo di e boto Interceptor. Esnan abordo di e otro boto Kinikini, a mara e boto di e piscado, y a lastre bay cune. A hibe na Noordpier, unda Ambulans por a controla e piscado.
