WILLEMSTAD: Diasabra mainta. Centro MOC di Wardacosta di Caribe Hulandes a ricibi alarma cu un boto ta confrontando problema riba lama.
E boto tin 3 hende abordo, y e tin problema cu motor, y el a cuminsa drief y yegando cerca di e barancanan cu tin na Bullenbaai na Curaçao.
Centro MOC a laga mesora nan Helicopter lanta vuelo, pa bay analisa e situacion di urgencia aki. Tambe a cuminza manda un boto special Metal Shark rumbo pa e area.
Ora cu e personal di Metal Shark a yega, nan a nota cu ya caba e boto a wordo pusha door di biento y coriente di lama y a pega na canto. Nan a mira cu tur tres persona abordo a logra bula for di e boto y bay para na canto.
Personal di Wardacosta abordo di e Metal Shark a logra di mara e boto aki, y a lastra esaki for di eynan y a hibe pa Boca Sami, unda e tres personanan tambe a wordo hiba. E boto a yena bastante cu awa, y a pidi yudansa di Bombero di Curaçao pa usa un pomp special pa saca e awa di eyden. Ningun hende a resulta herida.
