E peliger di infiltracion di Rusia den e exodo provoca pa Putin
*E poder di menasa presenta pa Rusia a wordo cuestiona
*Guera di Ukraine por produci momentonan crucial pa mundo
ORANJESTAD(AAN)- Si na inicio di 2022 a puntra hopi hende unda Ukraine ta situa, nan lo no por a presenta e contesta.
Ta ora Vladimir Putin a dicidi di invadi Ukraine, Zelensky a profila su mes na mundo y a bira inspiracion pa “no entrega” na e momentonan mas dificil cu por presenta.
Un lider nobo ta splica mundo cu mester enfrenta e poder di menasa presenta pa Rusia for di tempo cu Guera Friu den cual e menasa pa un guera nuclear tabata central, a presenta su mes.
E situacion na Ukraine tin mundo atrobe den tension debi na e forma cu e lider Ruso Putin, kier manipula cu un eleccion na e teritorionan cu el a conkista na Ukraine ora el a invadi e pais.
Segun Putin e teritorionan aki kier keda cu Rusia, pero e no por haci y deshaci manera e kier.
Mundo ta den suspenso mientras Putin ta bolbe menasa cu arma nuclear y ta exigi soldatnan hoben pa bay uni nan mes na un guera sangriente.
Segun informacionnan ayera Miles y Miles di hobennan Ruso ta huy for di Rusia pa evita cu nan mester uni nan mes na e guera cu a tene mundo ocupa for di inicio di e invasion dirigi pa Putin.
Den e situacion aki Zelensky, dirigente di Ukraine ta consagra su mes como lider di su pais, cu a confronta e poder cu tanto pais na mundo tabata tin miedo pa confronta pa e menasa di guera nuclear.
Zelensky ta para firme enfrente e menasanan Ruso pero ta tene na consideracion uno di e menasanan mas serio cu DIARIO na varios ocasion a trece dilanti ora papia di gruponan grandi di refugiado di paisnan Comunista.
Putin lo abusa di e miedo di tanto hoben Ruso y uza nan huida for di Rusia pa su soldatnan tambe drenta teritorionan Europeo, caminda refugiadonan kier bay?
Esaki ta uno di e retonan mas grandi cu mundo liber ta confronta den su sosten pa e lider di Ukraine, Zelensky.
E Guera di Ukraine a duna e salida di e epoca di pandemia, un rumbo nobo y a destrui e recuperacion cu mundo a spera.
Sinembargo, e logro grandi tabata cu Zelensky a duna prueba cu por enfrenta e menasanan di Vladimir Putin, cu mundo ta vigila mientras momentonan decisivo pa e confrontacion di Ukraine ta bati na porta.
