Con cambio di clima lo afecta terenonan disponibel na Aruba?
*Aumento di edad y independencia personal ta peso pa vivienda
*Prijs di vivienda enfrente entrada di ciudadano versus turismo
ORANJESTAD (AAN) — Manera na diferente ocasion DIARIO a trece dilanti, eleccionnan rond mundo a duna prueba di problemanan social creciente na un mundo cu ta experencia cambio total..
E problema di vivienda ta directamente relaciona cu migracion mundial cu tabata tin efectonan enorme pa mundo, cu a conoce cambionan enorme riba e tereno di comportacion humano. Hulanda ta prueba di esaki!
E problema di vivienda ta mara na e exigencianan social di un comunidad manera Aruba, cu tin un economia basa riba turismo, cu ya no ta limita su mes mas na e grupo cu por carga gastonan di hotel.
Pioneronan Arubano di ultimo tempo a percura pa proyectonan importante di apartamentonan pa turismo prome cu entrada di sistemanan pa turista pasa su vacacion na un cas cu ta reemplasa hotel y compleho di apartamento.
Mundialmente tin mas cambio importante cu ta resultado di globalisacion pues perdida di e tradicionnan di antes.
Den pasado, exigencia di vivienda tabata mara na preparacion pa bruid. Hopi bez tereno di familia, tabata acomoda un cas pa un pareha hoben.
Actualmente e problema di vivienda ta encera un cantidad di ciudadano cu a alcanza un edad, normalmente lo a haci cu nan no por biba na forma independiente.
E grupo di persona cu un edad cu ta mas halto cu e edad di pensionado, ta sigui subi y ta haci cu e cantidad di persona cu pa edad no por biba independiente, a baha.
E situacion cu a desaroya rond mundo tambe ta papia di e ansia di libertad di hende, cu kier biba independiente for di e momento cu nan tin nan mes entrada.
Actualmente tur hende mester di nan propio auto, nan propio cas, nan propio base di bida.
Den e cambio mundial cu a afecta bida familiar y a aumenta e exigencianan personal, e modelo di loke hende ta exigi a cambia sigur na paisnan cu ta biba di turismo.
Un pais cu ta destinacion turistico, ta entrega na su habitantenan e mundo di exigencia material enorme, cu e turista ta cumpra pa e sinti su mes rey na e pais cu e ta bishita.
Na un aldea chikito aleha for di ciudadnan grandi, hende ta construi cas solido teniedo cuenta cu proteccion cu hende mester contra tur elemento di peliger.
Aruba tin tamaño fisico di un ciudad chikito cu un economia gigante cu ta turismo, cu ta dicidi riba mercancia cu comercio mester ofrece, pero tambe directamente riba e exigencia social di e hende.
Bon planificacion di infrastructura no solamente ta exigi pa construccion di cas, den cual mester bay cuminsa atende cu e tipo di cas cu ta apropia pa cada grupo.
Gobierno tambe mester percura pa tin tereno entrega pa traha cas y pa e aparato di Gobierno por atende cu exigencianan pa yega na construccion, cu ta un sector importante di economia, pues comercio, di Aruba.
Aruba durante ultimo decada a wordo confronta cu scandal tras scandal riba asunto di tereno. Con sigui dilanti?
Den e mundo di cambio grandi nos dilanti, e momento a yega pa tene un congreso con mester sigui cu construccion na Aruba pa por enfrenta retonan nos dilanti.
Kico e limitenan mester ta pa un isla chikito, cu mester tuma medida tambe pa proteccion di costa y loke cambio di clima lo reclama na tereno?
Esaki ta un punto di preocupacion central y imediato na e islanan Hulandes den Caribe, cu mester contempla e peliger natural di cambio di clima pa terenonan cu awor ta centro di nan economia, centro di viviendanan, centro di bida na un pais, cu e alma di su economia directamente na uno di e beachnan mas famoso na mundo.
Ora DIARIO analisisa tur loke wordo papia di tereno, nos prome reaccion ta, kico responsabilidad pa futuro ta exigi na e momentonan aki.
Awor gremionan mester reuni cu Gobierno pa dicidi con den e futuro amenaza pa clima, ta sigui cu e maneho di infrastructura den cual e peliger pa e terenonan costoso na Aruba, riba cual economia te awe ta sigui crece, ta central.
Riba tereno industrial por mira con Aruba a laga refineria di azeta atras pa atende cu hydrogeno di futuro pa sostene economia di Aruba.
Esaki tabata importante den cuadro di salida di azeta den cuadro di cambio di clima.
Awor kico haci cu cambio di clima y su resultado pa tur construccion cu ta base di turismo di Aruba, den cual beach, solo, clima ta central?
Ora papia di construccion, di vivienda, di proyecto e punto central ta keda, tereno cu a duna hopi motibo pa escandalo pero awor mester ta motibo pa un Congreso pa papia di un futuro, cu no ta sigui spera!
