ORANJESTAD (AAN): Visser Trading Aruba, Benu Pharmacies y Partnersnan a uni forsa pa hasi donacion di medicina,
suplementonan medico, productonan di higiena y otro productonan di necesidad pa famianan y comunidad afecta na Venezuela resultado di e teremoto di juni 24.
E donacion humanitario aki a wordo entrega na Fundación Venezolana Pro-Cura de la Parálisis (FUNDAPROCURA), kende ta coordina actonan di alivio y ta asisti den areanan afecta incluyendo Caracas y La Guaira.
E contribucion a wordo realisa boluntariamente, den bon fe, y sin ningun condicion. E organizacion a confia FUNDAPROCURA pa realisa e donacion directamente na area mas afecta y cu mester di yudansa urgente unda ta segura ayudo di emergencia na personanan y famianan den necesidad.
Atravez di e iniciativa comuna aki, Visser Trading, Benu Pharmacies y Partners a percura pa duna sosten di ayudo practico, comfortabilidad y dignidad na personanan cu a perde un ser stima, nan hogar, nan pertenencianan personal y acceso na servicionan esencial.
Esnan cu a participa a pone enfasis riba solidaridad y cooperacion humanitario. Como negoshi y partnersnan den comunidad cu ta sirbi Aruba, nan ta kere fuertemente den extende compacion y asistencia na paisnan y comunidad den vecindario di Caribe y Latino-America.
FUNDAPROCURA ta expresa nan gratitud pa e contribucion generoso y den un tempo relativamente lihe. E ekipo di boluntarionan ta trahando duro directamente cu esnan afecta y a percura pa nan ricibi e suplimentonan aki.
E iniciativa aki ta refleha riba e relacion fuerte entre Aruba y Venezuela y ta demostra un impacto positivo cu companianan, proveedonan di cuido, fundacion y partner den comunidad ta logra si traha hunto.
Visser Trading, Benu Pharmacies y Partnersnan ta extende nan simpatia na tur esnan efecta na Venezuela y ta desea tur hende forsa y un pronto recuperacion.
