Tisa LaSorte, CEO di Ahata:
- Crecemento di volumen ta trece presion cu ne
ORANJESTAD (AAN)-- Tisa LaSorte, kende ta CEO di AHATA, den entrevista cu DIARIO a señala cu e volumen di turistanan no a baha, loke datonan ta mustra ta cu e volumen ta keda crece, pero e anochinan cu nan ta keda den hotel no a aumenta desde aña 2018.
Unico aumento den turismo cu Aruba a haya ta e anochinan cu nan ta keda den un acomodacion di vacation rentals, door cu nan no ta cumpliendo completamente ainda, cu impuesto y registracion.
“Pues pa nos, e preocupacion ta pakico e crecemento ta bin den e sector ey so. Loke si nos ta mira ta, ora nos ta papia cu e balor ta crece, ta cu e balor nos mester midi’e na cada persona. Si ta average bo ta evalue pa cada mercado. Cada bishitante average, cuanto e ta gasta pa dia. Si e volumen di turista crece, claro e gastamento total tambe ta crece”, LaSorte a señala.
El a indica cu loke tin cu evalua ta cuanto e individuo ta gasta y si nos industria di turismo ta creciendo den sentido cu nos ta haya mas bishitante, cu ta gasta mas envez di mas bishitante cu ta gasta menos.
“E vision ta cu nos mester reemplaza cu envez cu envez di keda crece hopi den volumen, pasobra Aruba ta sinti e peso caba den volumen, ta mira e efectonan negativo di keda crece hopi den cantidad, bo tin presion riba beach, riba caminda, anyway nos tin hopi hecho, cu ainda no por a soluciona, y cu tin di haber cu volumen.
E ora ey loke por haci como estrategia, ta bisa cu na luga di crece hopi den volumen mi ta bay reemplaza personanan cu gasta menos na Aruba, cu personanan cu ta gasta mas akinan. Esey kiermen gasta den tur cierto manera, cu nan ta bay restaurant, nan ta haci actividad, of nan ta paga den acomodacion, pero cu nan gastamento total ta crece. Dus, cu ta crece e porcentahe di bishitantenan cu gasta mas. Esaki ta logra cu strategia, analiza bo mercadonan y e ora ey bo ta atrae nan”, CEO di AHATA, Tisa LaSorte a remarca.
