DIARIO ta discuti puntonan central den maneho nacional cu expertonan --- *35 aña despues di morto di Betico e forsa di Florin Arubano ta central --- Aruba cu su propio Ministerio Publico pa atende cu decadencia politico
ORANJESTAD (AAN) — Tabata madruga di 26 di November 1986, cu DIARIO a ehecuta uno di e plannan mas tristo y doloroso cu el a yega di prepara.
Mientras repartidornan di DIARIO ainda tabata reparti e edicion oficial di e dia, DIARIO a cuminsa prepara un edicion special cu mester a wordo reparti prome cu solo sali pa pone Aruba na haltura cu Betico Croes a despedi pa semper.
Na momento cu Aruba tabata yora salida di Betico Croes 35 aña pasa, e pais tabata trata di recupera di e heridanan economico y financiero causa pa e hecho cu Lago a cera su portanan a pesar di tur esfuerzo cu Betico Croes a haci.
Sinembargo, na 1986 Aruba hamas por a pensa cu na 2021, e pais cu Betico Croes a entrega su Status Aparte, lo tabata lucha pio cu nunca pa recupera di un desastre financiero hereda y na mes momento di e atake brutal di un virus cu a provoca e malesa Covid-19.
Na 1986 Aruba por a traha un plan pa futuro debi na e base constitucional cu Betico Croes a laga atras y cu a haci cu Aruba na forma independiente di Antia Hulandes por a crea un base economico nobo y financiero nobo.
Como politico, Betico Croes a wordo kibra prome cu morto a pone fin na su bida, dor di su enemigonan.
Argumentonan falso a wordo uza pa bisa Aruba cu ta pa miedo di Status Aparte bou maneho di Betico Croes, Exxon a cera porta di Lago, mientras Exxon mes a spera resultadonan di intento di Betico Croes pa haya un prijs preferencial di azeta cu Venezuela, prome cu Exxon a dicidi cu continuacion di Lago lo a bira un negoshi cu perdida.
Si cu mentira a trata di destrui e logro grandi di Status Aparte cu Betico Croes a opone, awe husticia ta wordo haci y logro di Betico Croes ta haci cu Aruba por uza su propio posibilidadnan y medionan pa e por reconstrui su futuro mescos cu na 1986 tabata Betico Croes cu a percura pa Aruba tabata tin e base legal pa por a atende su propio asuntonan.
E vision di un lider real, cu Betico Croes na un forma excepcional den historia di Aruba tabata, hamas ta muri.
Cada rato cu hende honesto habri buki di historia, ta topa cu e realidad cu ta splica con Betico Croes a haci e lucha di Aruba pa Status Aparte realidad pero no solamente pa Aruba pero hasta pa otro islanan Antiano.
Antayera Sint Maarten a celebra Dia di Sint Maarten, mescos cu Curacao tambe ta celebra su Dia di Himno y Bandera, a base di e ehempel di Betico Croes pa alcansa Status Aparte den Reino, manera despues di Aruba a bira e sistema estatal pa Curacao y Sint Maarten tambe.
Un lider real nunca ta muri ni mester di forma artificial pa keda recorda. Betico Croes awe ta sigui demostra esaki.
Expertonan ta confirma na DIARIO cu awe Aruba por yega na acuerdonan cu Hulanda, por traha na forma independiente riba su recuperacion financiero atrobe pa motibo di e contenido di Status Aparte y sigur e hecho cu Florin di Aruba tambe ta autonomo y tin como protector e Banco Central di Aruba, cu ta obra di Betico Croes.
Awe Aruba por persigui e enemigo mas grandi di bienestar di Aruba cu ta corupcion politico.
E vision di Betico Croes tabata su exigencia pa persecucion penal no tabata den man di otro instancia cu no ta e Ministerio Publico di Aruba cu na 2021 manera expertonan ta indica ta hunga un lugar central den un decadencia total di politica.
Ora Aruba a acepta su Status Aparte, hamas e pais por a pensa, cu su politiconan lo por a pone su cara na berguensa y cu hasta den su Parlamento, acusado persigui pa husticia, tin asiento.
Hunto cu expertonan DIARIO ta repasando e herencia di Betico Croes, cu como lider real te awe ta dicidi pa Aruba cu loke el a laga atras como base legal di un pais autonomo.
Vision di un lider real nunca ta muri, manera ta keda confirma awe cu lucha, trabou, decisionnan y logro di Betico Croes como representante maximo di e alma Arubano, manera hunto cu expertonan DIARIO ta demostra y lo bay sigui demostra pa hubentud comprende pakico futuro lo spera semper y entrega nan un porvenir!
