Atrobe e probiotico mas busca a caba den tur botica:
ORANJESTAD (AAN)—Den e siman cu ta tras di lomba, varios ciudadano a pasa dianan masha fastioso cu problema di barica, esta un diarea formal, algun caso tambe cu sacamento.
Pa colmo tin hende cu no por a meld AO pasobra e sistema tabata off, alomenos entre Diahuebs cu Diabierna, y no por a uza e app tampoco pasobra no por a traha cu e sistema, door cu e no ta acepta e password ni username. Ban wak si dialuna por haci algo, pasobra esnan asegura cu a pasa door di esaki ta keda preocupa.
Tin un probiotico cu hopi hende ta busca den e temporadanan cu e virus ta afecta hopi famia, pasobra basta un hende den cas hay, un tras di otro ta sigui, y como cu e ta un remedi natural cu ta yuda di baby te adulto mayor, masha lihe ta e boticanan ta keda sin bashi di e probiotico aki. Un persona a bay na practicamente tur botica den Playa y Santa Cruz, diasabra y no tabata tin. For di botica mes a haya sa cu e cantidad cu e agencia ta bestel no ta yega pa e demanda cu tin, esaki tanto den temporada normal cu ta wordo cumpra pa prevencion, como den e lapso cu e virus cu ta causa diarea ta ripiti, cu ta mas of menos den dos pa tres periodo pa aña.
E probiotico aki ta bin di Colombia, y si den e pais aki tambe tin andansa di diarea, ta mas dificil pa Aruba hay'e den poco tempo. Tin biaha ta keda di dos pa tres luna sin cu por wordo importa.
Tin biaha ta entre un pa dos dia e persona ta bira malo, pero e ultimo temponan e ta dura mas, te hasta un siman largo, manera ta e caso actualmente. Hidratacion ta bira un necesidad cu no por laga bay y hopi hende ta prefera pa cumpra e boternan di likido cu smaak, cu ta zero sucu y cu ta contene mineral y electrolyte. Y esakinan no ta asina barata tampoco.
Docternan di cas mes no ta partidario di receta pildo pa stop e diarea pasobra pa e tripa mes, no ta bon, si un hende ta tuma un par di pildo mas di loke a wordo prescribi por cera su barica na un manera tiki peligroso. Pero wanta cu e malestar y bay baño cada rato ta sumamente incomodo. E pregunta cu diferente ciudadano tin, ta di con e problema di tripa aki a bira asina comun y ripititibo na Aruba?
