ORANJESTAD (AAN): Recientemente DIARIO a entrevista Marisol Croes lider di Proyecto Kibrahacha
y el a splica cu e proyecto aki a origina for di e Vierlanderoverleg na 2019, unda cu e enfasis ta riba hisa e calidad di nos maestronan den formacion.
“Nos maestronan den formacion historicamente a wordo forma dentro di institutonan, manera IPA na Aruba y Universidad di Corsow na Corsow, cu ta haci e lerarenopleiding”.
Loke nos a cambia structuralmente aworaki ta cu e studiantenan ta haya training den scol.
Nos tabata mira un gap hopi grandi entre locual e scol ta spera di e maestro y loke e instituto ta kere cu nan mester hinca den un maestro pa forme, pero aworaki e grupo ta trahando hunto.
Loke tin mas orguyoso ainda ta cu nos ta trahando riba e calidad di e scolnan, segun Croes.
El a sigui bisa cu tin 16.5 scol na Aruba, Boneiro y Corsow cu ta hayando training specializa den ‘21st century skills’ y den material Caribense wordo, pues con pa yega mas cerca di e necesidadnan di e alumno.
“Nan tambe ta esunnan cu ta bezig ta tumando coleganan cu ta wordo forma den e scol, pa hunto nan crece y bira un lugar profesional di conocemento”.
Esaki ta nifica cu nan ta haci nan ‘research’ na scol y ta tene discusionnan riba calidad, den scol mas, segun Croes.
El a bisa tambe cu for di basta tempo ta haciendo e cosnan aki pafo di scol, pero cu ora cu bo bin cu e discusion unda cu e mester ta bo ta ripara cu e cambionan ta pasa mas lihe pasobra nan mes a tuma e responsabilidad.
Croes a indica cu ta prome biaha cu Aruba, Corsow y Boneiro ta haciendo esaki bao di e mesun dak.
“Bo ta mira cu e energia ta enorme, pasobra aworaki nan no ta siña solamente for di e bon practicanan na Aruba, sino tambe na Corsow y Boneiro”.
Asina ta crea tambe un red mas grandi di colega cu por carga e proyecto hunto, segun Croes.
