Senadornan Mericano a expresa nan preocupacion enfrente 2024
- Relacion Rusia y Venezuela cada dia mas fuerte den mundo na guera
- E poder petrolero di Venezuela cu e reservanan mas grandi na mundo
ORANJESTAD(AAN)- Kico ta haci posibel, cu un persona manera Nicolas Maduro, a haci cu mas cu 7 Miyon Venezolano, ya a bandona nan pais? Kico ta haci posibel, cu Nicolas Maduro cu a nace den sombra di Hugo Chavez, actualmente mester wordo considera uno di e peligronan mas grandi no solamente pa democracia, pero tambe pa seguridad mundial?
Pa comprende e momento grandi cu historia mundial a entrega Nicolas Maduro, mester busca e motibo principal di su forsa, cu ta petroleo, sigur den un situacion mundial di guera, economia caotico, inseguridad pa futuro.
Manera DIARIO na varios occasion a trece dilanti, cu ora bay na raiz di tur e problemanan cu mundo conoce actualmente, ta topa cu un elemento: poder di petroleo, cu pa colmo un cantidad enorme di hende rond mundo, ni sikiera ta reonoce.
Na momento cu mundo a dicidi cu lo pone un fin na petroleo y 2050 a bira e planificacion futuristico di un mundo nobo sin petroleo, DIARIO a mustra riba e resultadonan cu esaki lo tin no solamente pa refinerianan y negoshi den petroleo, pero pa tur sector na mundo.
Venezuela ta dilanti costa di Aruba. Segun Nicolas Maduro, Aruba ta parti di Venezuela. Aparentemente tur hende kier lubida esaki y tambe lubida cu Divino Providencia a haci cu PDVSA no a habri un filial di Citgo na Aruba, na momento cu e Guera di Petroleo mundial lo a escala.
No ta pa motibo di un fabrica di juice of un cualkier tipo di industria cu ta produci algun Miyon, Europa entre otro a cera porta pa comercio cu Venezuela cu e speransa falso cu asina por baha Maduro.
Si e intentonan pa uza medida economico contra Maduro a fracasa, ta pa motibo cu Maduro tin e producto principal, cu ta petroleo.
Venezuela ta uno di e paisnan fundador di OPEC, cu tabata e motor grandi pa na momento inespera, mundo ta enfrenta atrobe un prijs di petroleo, cu lo subi tur prijs na mundo y lo causa hamber y miseria pa hopi hende.
Venezuela lo tin e reservanan di petroleo mas grandi na mundo, segun cifranan internacional. Petroleo cu mundo mester, pa den e cambio di clima cu ta produci calor, hende tin coriente pa cende nan airconditioning.
Petroleo cu e bus mester pa e ta transportacion di hende cu mester bay nan trabou. Petroleo cu te ainda mundo mester pa e funciona. Petroleo cu realmente ta e causa di guera rond mundo y tambe tabata motibo di e invasion di Rusia na Ukraina cu su camponan grandi di petroleo.
Rusia, despues di Merca considera e pais mas poderoso di petroleo, ta e aliado grandi di Nicolas Maduro, cu mester keda na poder pa paisnan peligroso, cu a comberti Venezuela den nan centro.
Nicolas Maduro ta e figura central den su region di expansionismo di gruponan peligroso y lamentablemente su region ta den porta di Aruba.
Na 2024 Venezuela mester eligi un Gobierno nobo, manera DIARIO na varios ocasion a informa su lectornan.
Un temporada nobo di gobernacion di e Presidente di Venezuela ta cuminsa dia 10 di Januari 2025.
E compania Mericano Chevron ta uno di e pruebanan con importante petroleo Venezolano ta pa negoshi internacional.
El a haya permiso pa atende cu Venezuela.
Gobierno Mericano pa medio di Senadornan ta wordo adverti pa e peligro cu Venezuela ta forma pa stabilidad y paz mundial y cu mester tin bista di desaroyonan na Venezuela na caminda pa eleccion 2024.
Ya tin indicacion cu e Gobierno actual di Venezuela ta atenta contra reglanan pa un eleccion limpi, manera den e carta di e Senadornan ta bini dilanti.
Na Juni, Nicolas Maduro a exigi pa Conseho Electoral di Venezuela bay cas. Observacion di e eleccion dor di paisnan Europeo, lo no ta posibel mas.
Den e carta di e Senadornan Mericano pa e Secretario di Estado Mericano, Blinken, alarma ta wordo bati pa e menasa di intervencion di Nicolas Maduro den eleccion na Venezuela.
E Senadornan Mericano ta mustra riba e peligro cu leynan cu ta regla eleccion lo no wordo sigui y cu e necesidad pa porta no wordo cera na participacion di candidatonan cu ta contra Nicolas Maduro.
Sin duda e carta cu e Senadornan Mericano a manda pa e gobernante Mericano, Blinken, ta un recordatorio pa mundo liber sigur den un situacion internacional di guera na momento cu petroleo ta destabilisa situacion mundial.
Pa Aruba e ta un recordatorio cu den porta di cas, tin problema grandi y tambe peliger pa e seguridad nacional di Aruba.
E bienestar di Aruba den e instabilidad mundial cu ta creciente riba tur tereno, mester keda interes number uno sigur mientras fecha pa eleccion na Venezuela na 2024, ta yega mas cerca.
