Clifford Rosa, director Fundacion Rancho:
- Danki na donacionnan di 2025, entre nan esun di NV Elmar
ORANJESTAD (AAN)- Fundacion Rancho a yama un conferencia di prensa, den cual señor Clifford Rosa, Director, a hiba palabra.
Clifford Rosa a expresa cu nan ta hopi contento di sinta hunto un biaha mas, pa nan por a yega na 16 aña di existencia, locual ta encera un esfuerzo bastante grandi, cu como fundacion nan ta haciendo e ultimo añanan aki, pa duna un tiki na nos comunidad.
“Manera tur hende sa, ainda nos ta bao efecto di e pandemia, y hopi programa y ideanan cu e fundacion tabata tin na 2019 y comienzo di 2020, lamentablemente, nan mester a adapta nan mes y esaki a causa cu ainda nos ta buscando un manera pa, con pa sigui cu diferente di e proyecto y iniciativanan. Un di nan sigur ta adopta un hanchi, cu ta un proyecto cual tin hopi necesidad pa sigui cu ne”, Clifford Rosa a señala.
Otro proyecto cu señor Rosa a menciona yama “E tempo pa click” cu nan a inicia y cual ta duna un perspectiva diferente na e exposicionnan cu nan ta bin cu ne.
“Pero tambe, sigur, e Hoffi Bario den Rancho, cu ta otro proyecto cu nan kier sigui desaroya.
Loke mi kiermen cu esaki ta, cu e diferente proyectonan ta bay conoce un bida nobo den e contexto, cu nos ta bay ta reactivando e tipo di eventonan aki, y actividadnan p’asina aki nos conserva parti di nos historia y cultura di e bario di Rancho”, Clifford Rosa a señala.
El a agrega cu diferente proyecto piloto cu nan a trece dilanti, a mustra e interes y e necesidad tambe pa sigui cu nan.
“Y p’esey como directiva, sigur, nos ta hopi contento cu e yudanza, cu e donacionnan, di 2025, sin laga afo e donacion cu nos a haya di NV Elmar, cu ta un donacion cuantioso cu ta pone nos pensa kico nos ta bay haci den e prome cuartal aki, di aña 2026”, Clifford Rosa a expresa.
