Rulienne Arends di FADA:
- Nan no ta mira e peliger cu nicotina ta ocasiona
- Mucha di apenas 7 aña a uza vape
ORANJESTAD (AAN) – Vaping ta birando un problema cada bes mas preocupante entre muchanan y hobennan, incluso entre muchanan di apenas 7 aña. E cigarianan electronico por contene nicotina y otro substancianan dañino cu por afecta desaroyo di cerebro, pulmonnan y salud general. Segun expertonan, educacion y orientacion di mayornan ta fundamental pa preveni adiccion y proteha bienestar di nos muchanan.
Rulienne Arends di FADA a indica cu durante varios aña e fundacion a adverti riba e peligernan di vaping, ainda prome cu e problema cuminsa drenta nos scolnan. Segun e, den e ultimo tres añanan FADA a ricibi un aumento significativo di peticionnan pa charla y presentacion riba e tema, cu awor ta entre e topiconan mas solicita.
E charlanan ta enfoca riba e efecto dañino di vaping a corto y largo plazo. Aunke investigacion cientifico ainda ta evaluando e impacto completo di vaping, tin indicacion cu uzo prolonga por aumenta e riesgo di varios problema serio di salud, incluyendo cierto forma di cancer.
Arends a splica cu unabes cu un hoben bira adicto na vaping, ta dificil pa cambia su mentalidad, specialmente si e uzo ta wordo acepta of permiti den cas. El a revela cu vaping ya a drenta algun scol basico, mencionando un caso unda un mucha di 7 aña a uza varios aparato di vape prome cu su mayornan a haya sa.
Segun Arends, e rol di mayornan ta crucial. Si un mucha ta haya aprobacion pa vape na cas, e no ta percibi e riesgo real cu e producto ta representa. E situacion ta bira ainda mas compleho door di influencia di medianan social, unda hopi informacion incorecto of incompleto ta circula y ta influi decisionnan di muchanan y hobennan.
Un argumento comun entre algun hoben ta cu nan nunca a tende di caso serio relaciona cu vaping na Aruba. Sinembargo, Arends ta asegura cu tin caso local, aunke hopi biaha esakinan no ta bira publico.
El a enfatisa cu e peligro principal di vaping ta e presencia di nicotina, un substancia altamente adictivo. Investigacionnan a mustra cu dependencia di nicotina por aumenta e posibilidad cu un persona busca otro substancia den futuro.
FADA ta continua su campañanan di concientisacion door di testimonionan, videonan y imagennan real di hobennan cu a sufri consecuencianan serio di salud, incluyendo problema di pulmon. E fundacion ta desaroyando material audiovisual nobo cu ta pone enfasis riba e ingredientenan den vape y e efectonan potencialmente dañino. Mas informacion por haya riba e paginanan social di FADA.
