ORANJESTAD (AAN): Personanan cu a yama a laga sa, cu nan a djis sende “e sonido” produci pa e ola di movimento di e temblor.
Aunke mayoria a indica cu nan no a sinti trilling di muraya, ni di bentana, y tampoco di porta y dak na cas.
Pero tin hende cu si a sinti con e plachi di zink riba nan dak a sona masha duro mes.
Tabata Diabierna 30 di Juni 2023, pa 12:23 am cu e temblor aki a wordo sinti. Su centro a wordo localiza na 13.01º Nort y 70.77º West. Esaki ta como 88 km Noordwest di Faro di California na Aruba. Esaki ta igual cu 67 km panort di Monkey Islands.
E instancia oficial na Venezuela a raporta cu e temblor aki tabatin un magnitud di 3.4 riba Scala di Richter. Aunke Servicio Geologico Colombiano a indica cu nan sismometernan a registra esaki na uno fuerte di 3.7 riba Scala di Richter.
E epicentro tabatin un profundidad leve, esta di 33.9 km.
