Ta djis pa entrega Dagvaarding...
ORANJESTAD (AAN): Imaginabo ta haya un yamada rush-rush, cu ta mustra di ta un caso sumamente urgente, y percura pa menos di 90 minuut bo ta presente pa atende bo asunto. Mayoria hende tin auto na nan disposicion, y un hefe cu por duna OK pa bo core sali un rato. Pero que hubo di esnan cu ta bibando na San Nicolas y mester di transporte di Bus pa move?
E relato cu DIARIO a ricibi ta di dos hende kendenan den oranan di mainta, esta pa 10:00 am a haya yamada di un funcionario di Ministerio Publico na Playa, caminda e ta informa e ciudadano via telefon, cu e tin di pura, subi auto, y core bay rumbo pa nan adres den Rumbastraat.
Esey ta debi cu e funcionaria di Ministerio Publico a bisa cu cueste loke cueste nan mester yega oficina di Ministerio Publico prome cu e ora di 11:30 am, sino nan lo hiba nan Corte.
Un di e personanan aki a splica, cu for di e yamada el a kere cu si e yega prome cu 11:30 am na OM su oficina, e persona lo yud’e pa asina evita di bay Corte. Pero grandi tabata su sorpresa ora el a yega, y e persona a djis rek man y entreg’e un “Dagvaarding”. E Dagvaarding aki ta djis contene un fecha pa caso den Corte, y y nomber di Huez cu lo atende.
“Pa esaki a lagami rush rush asina hopi?”
E ta puntra di con no ta sigui entrega Dagvaarding na cas di hende, manera semper ta e forma etico y normal di semper? Si acaso no tin hende na cas, por lag’e den postbus na cas, y esey ta algo cu tambe tabata socede na diferente ocasion.
Pero e “call and bait” aki pa algo cu nan por a djis manda via email, of via post, y e estilo di semper, esta entrega personal.
E ora a bolbe yega na e pregunta: Si acaso e Dagvaarding aki tabata pa un ciudadano di Pariba di Brug, sigur hamas e lo a yega na tempo pa wordo atendi prome cu 11:30 am.
Hopi hende tabata yega: Mirando e hecho cu e wachtkamer na Ministerio Publico tabata sigui yena, cada rato cu mas hende drentando na careda prome cu 11:30 am, ta indica cu e situacion aki ta algo cu no ta normal. E pensamento ta cu a pone hende tur spanta, core rush-rush, kizas core no mucho cauteloso den trafico, pasobra cueste loke cueste kier a yega Ministerio Publico pa e deadline... y a resulta cu ta djis un carta di Dagvaarding nan tin pa pusha den bo cara.
Tin hopi otro forma y ruta cu Ministerio Publico por a uza pa yega Roma... y esaki sigur no ta algo etico.
