ORANJESTAD (AAN): Variante Mu di coronavirus a wordo detecta den 49 Estado di Merca, cu Florida y California a registra e cantidad mas grandi contagio di Mu.
E cientificonan a adverti cu e variante nobo di covid por ta mas transmisible cu hasta variante Delta, y por ta resistente na vacuna.
California a registra 384 caso di variante Mu, 167 di nan den zona di condado di Los Angeles.
Alaska tabatin e cantidad mas grandi di caso di Mu, cu 146 persona positivo. Cu un poblacion relativamente chikito, di 730 mil persona, Mu ta representa 4% di e tamaño di e Estado.
E variante a wordo identifica pa prome biaha na Colombia den luna di januari y hasta prome siman di September a wordo identifica den 42 pais.
Solamente 1% di muestranan di covid na Merca ta contene variante Mu, mientras cu variante Delta a representa 99% di casonan.
Mu no ta un “menaza inmediato”, docter Anthony Fauci a asegura den un conferencia di prensa. Pero cientificonan “lo vigila hopi di cerca”.
“E variante tin un constelacion di mutacion cu ta sugeri cu por evadi cierto anticurpa, no solamente monoclonal, sino esnan induci pa vacunanan y plasma”, el a confirma.
Te cu diamars, Mu solamente a registra 2 mil caso alrededor di Merca, segun Iniciativa Mundial pa Comparti Tur Dato riba Griep.
Departamento di Salud Publico di condado di Los Angeles a emiti un comunicado na unda nan a splica e necesita di estudionan pa haya sa kico ta na caminda: “mas estudio ta necesario pa determina si variante Mu ta mas contagioso, mas mortal of mas resistente na vacuna y tratamentonan cu otro variantenan di Covid”, el a enfatiza.
Director Barbara Ferrer, di Departamento di Salud Publico di Condado di Los Angeles, a subraya importancia di vacuna: “e identificacion di variantenan manera Mu, y propagacion di variantenan rond di mundo, a mustra necesidad cu residentenan di condado di Los Angeles sigui tuma medidanan pa protehe nan mes y otronan”.
“Pa motibo aki ta hopi importante pa vacuna y establece un serie di proteccion. Ta accionnan cu ta kibra cadena di transmision y ta limita proliferacion di covid, esaki lo evita cu e virus por conoce otro mutacion, cu por ta hopi mas peligroso.”
